برنامج عمو طعميني مع الأبلة مسعودة.. 🥣♨️🍛🍜🍝🥮

[محمد داود العونه]

.🍅
. 🌶️
. 🥒
. 🥬

برنامج عمو طعميني مع الأبلة مسعودة.. 🥣🥘🍖♨️🍛🍜🍝🥮.✌️ 😁😎✌️

. 🍒
. 🍓
. 🍒
. 🍅

[محمد داود العونه]

طبق اليوم : قلاية بندورة من الآخر 😁
المقادير :
١/ 4 حبات بندورة كباااار هيك وقاسيات كثير.
٢/ كم فص ثوم كبير الحجم، وراس بصل بلدي من الي بخليك مش تدمع، لا، تموت من العياااااط 😁
٣/ فنجان زيت زيتون أصلي مش مغشوش، وتكثرش زيت زيتون غالي لأنه، فنجان وسط بكفي
٤/ حبة فليفلة حلوة خضرة، مع قرن فلفل حااااااار
٥/ بيضة / حسب الذوق

٦/ قلاية قدددديمة واذا مصدية بكون احسن



طريقة الاعداد..

بتشوفلك مكان بترتاح فيه كثير، بتقشر راس البصل، والثوم.. قطع البصل قطع صغيرة الحجم، وكذلك التوم أو الثوم فش فرق 😁، بس تخلص عياااط، بتمسك البندورة وقطع البندورات قطع وسط لا كبيرة ولا صغيرة.. حطهم بصحن..
امسكلي القلاية اقلك.. بتحطها علي النار وبتسكب باسم الله الزيتات.. وحط البصل المفروم.. اوعى تحط الثوم أول أو مع بعض.. عشان الثوم بستوي قبل البصل وبنحرق وبصير طعم القلاية مش طيب.. خبرة اه لعد كيف هههه، بتحوس البصلات لبين ما يصفر لونهم، بتحط فوقيهم الثوم.. وقرن الفليفلة الحلوة والحاااار، دقيقتين بس، بتوطي النااار، وبتدير البندورة عليهم بتحط الملح.. رشة مع شوية فلفل اسود كمان رشة.. بتقلب البندورة مع البصل وبتغطي القلاي.. عشر دقايق بترجع تقلب وبس تذوب البندورة.. بتكون استوت الطبخة.. ممكن تفقس بيضة عليهم.. حسب الطلب..
بتسخن كم رغيف خبز على النار.. مع شوية جرجير
اقعد وقول بسم الله وتناول الطبق..

ملاحظة / ما بعد التناول مهما رأيت من كائنات لا تخاف فتلك الكائنات لن يطول مكوثها طويلا..

.
. ويفضل كتابة وصيتك قبل البدء في الأكل.. هههه

.
. وصحتين وعافية..

انتظرونا مع طبق جديد من برنامج آخر طبق بحياتك مع الأبلة مسعودة 😁هههه😂
.
.
.
. كل التقدير والاحترام

[محمد داود العونه]

برنامج عمو من شان الله لاطعميني مع الأبلة مسعودة..😂

طبق اليوم / المنزلة (منزلة بيتنجان)😁، ومحداش يسألني شو منزلة البيتنجان عيب لأنه وبلاش نخسر بعض هههههه😂

المقادير :
1/ من ٣ إلى ٤ حبات، روس، بيتنجان، اختار الحبات كبار الحجم وقاسيات وطوال وبلمعوا من كثر ما هم سود وطازة.. 😁. / حسب العدد

2/ كاسة كبيرة الحجم من زيت القلي / اي نوع مش مشكلة.

3/ كاسة متوسطة الحجم من زيت الزيتون.
4 / ٢ حبة بندورة مقشرة طازجه.

5/ راس بصل كبير الحجم.

6/ رب البندورة معجونة البندورة، صلصة البندورة كلو واحد

7/ مقلاية كبيرة الحجم .

٨ / طنجرة متوسطة الحجم.

٩/ ملح طعام.


طريقة الاعداد..

أول شي بتغسل حبات البتنجان كويس، أوعك تقشرهم بعدين بقلكوا ليش 😁، تركهم بقشرهم .. شيل القمع الأخضر، قطع الحبات شرائح طولية سميكة الحجم ضعف حجم الأصابع..، ومن ثم رش عليهم شوية ملح لا تكثر، وتركهم يناموا شوي هههه، صحيلي البندورات الجميلات والمقشرات وافرمهم قطع صغيرة جداً، قد ما تقدر بس أوعى تجرح اصابعك مش مستعجلين مطول الأذان لأنه 😁..، بس تخلص الله يسلم إيديك ويعطيك العافية، على راس البصل، قشره وقطعه كمان قطع صغيرة أو وسط..
بنجيب قلاية الزيت : هات يا مسعود قلاية الزين واسكب فيها زيت القلي..، بنصحي قطع البتنجان : خلص شباب بكفي نوم وقت القلي هسا هههه، بنقلي حبات البتنجان حتى يسمر لونهم، مش ينحرقوا يا مسعود إنتبه الله يخليك لأهلك، بنجهز صحن فاضي وبنفرشه بقطعة فاين المطبخ، ملقيتش حط فاين عادي ولشو البعزقة هههه، الي بنقلي بنحطه بالصحن لينشف من الزيت بنتركهم لينشفوا.. بنجيب الطنجرة بنسكب باسم الله زيت الزيتون بس يسخن بندير فوقيه البصلات الجميلات هههه، وبنحوسهم خمس دقايق.. وبنسقط فوقهم البندورات وبنقلب حتى تذوب البندورة شوي ..بنجيب كوب ماء ساخن نسكبه فوق البندورات مع ملعقتين رب البندورة بنحرك المزيج و بنرش عليهم شوية ملح ومن ثم بنسقط قطع البتنجان قطعة، قطعة، دون أن نقلب القطع / حتى لا يتقطع البتنجان.. ونتاكد بأن البيتنجان قد غمر بالماء خبرة لعد كيف هههه، نغطي الطنجرة ونوطي النار.. ونتركها من عشر دقائق إلى ربع ساعة.. حتى يختلط المزيج وتذوب القطع.. وهيك بتكون الطبخة جاهزة..

بعض الزيادات / قد تزيد على الطبق لحمة مفرومة ناعمة وتوضع بعد البصل
وهناك من يحب المنزلة مع حمص حب..

انا وجدتها كما أعلاه أطيب.. بعديها بتجيب راس بصل كبير بتقطعة بصحن.. وكم رغيف خبز ساخن.. وتناول الطبق وادعيلي ههههه

أمور يحب على المتناول التأكد منها :
ترك صحن ما بعد الاكل لثاني يوم عشان تذوقها بايتة.. 😁

عند تناول الطبق إحرص على ان تكون بحانب سرير أو بطانية.. ويكون ثاني يوم إجازة..
الصلاة صلاة مودع قبل التناول ههههه
وطبعا كما سابقا كتابة الوصية..

.
. صحتين وعافية..

طبقنا القادم إن شاء الله / صحن خبيزة ملهوش حل.. 😁
.
.
. مع تحيات أبلة مسعودة
.
.

[محمد داود العونه]

نقطة نظام ..

نسينا إخباركم لماذا نترك البتنجان بقشره..؟
الجواب :
لأنه حينما يكون بقشره لايذوب سريعا، أطيب..شكله اجمل..
وبيني وبينكم بلا تقشير بلا وجعة راس هههه😁، هيك اسرع ههه
.
. كل التقدير والاحترام للجميع

[محمد داود العونه]

وها نحن نعود معكم أعزائنا المشاهدين مع برنامجكم دلع كرشك ومع آخر طبق في حياتك.. في حدا بعده على قيد الحياة...؟ 🤣🤣
إن كان ما زال في الكرش بقية فهيا معا لنحضر طبق الملوخية.. 🤔
: أي ملووخية يا رجل.. قصدك الخِبَيزة باللبناني 😁
ما شاء الله عليك يا مسعود هيك بعدك على قيد الطبيخ ههه، اطلعلي للبر وحشلي خبيرة.. اختار ورقتها صغيرة ووسط ماشي.. عبين ما أجهز المقادير يا ميمتي.. 😁

: ضروري اذكره كان 😡

: شو بتحكي؟!
: لا، ولشي هيني رااايح أحش

* حِشْ، حِشلي : اتمرمغ بين الأعشاب وأجمع خبيزة.. 🤣
*عبين : بمعنى حتى

مسعود : حتى الي تحشك.. 🤣🤣

[محمد داود العونه]

:هاااا كيف ضمة هالخبيزة! بتنجنن صح؟ 😁.. : إنت متأكد هاي خبيزة.. 🤔🤔.. : آه شووف.. : وماال وراقها تقول ياقطيين.. 🤔.. : يا رجل لا تجنني بقلك خبيزة 😡

المقادير :

١/ ضمتين لثلاث من الخبيزة / حسب العدد
٢/ طنجرة وسط
٣/ مصفاة حشائش كبيرة الحجم
٤/ راس بصل كبيييير، ما في كبير هاتلك ٣ صغار
٥/ ملح طعام
6/ ليمون / اهم من الخبيزة الليمون والله ههههه
٧/ فنجان وسط من زيت الزيتون
انسينا اشي يا مسعود.. 🤔


طريقة الإعداد :
نقوم في البداية بغسل الخبيزة اكثر من مرة حتى نتأكد من انها على درجة عالية من النظافة.. 😁، ومن ثم نزيل أي أعشاب مختلطة معها أو أي أوراق او سيقان تالفة..نستبعد السيقان الخميلة والقاسية.. ونترك النحيلة والطرية.. نزيل نهايتها بقطعها مرة واحدة.. ونبدأ نفرم الأوراق السيقان مع بعض حتى تصبح صغيرة الحجم متشابهة الحجم.. اذا عندكم فرامة كهربائية بتريحكم كثير 😁، ومن ثم نضعها في المصفاة نغسلها مرة أخيرة ونتركها تتصفى..
نحضر راس البصل ونفرمه هو الأخر فرما بلا رحمة هههههه.. وعندما ننتهي نحضر الطنجرة ونسكب الزيت وفوقه البصل نقلبه قليلاً مع رشة ملح على النار نحوسه حوسا لا هدوء بعده هههههه وعندما يبدأ بالاصفرار نحضر الخبيزة ونسقطها فوق البصلات سقوطا لا نهوض بعده ههه، نقلبها مع البصلات ونوطي الناار ونغطيها، ضروري نغطيها.. ونتركها عشر دقايق، نعود لها ونقلبها قليلاً.. وتركها من خمس إلى عشر دقايق.. وهكذا تكون طبختنا استوت 😁.
نضع الخبيزة في طبق كبير ونعصر عليها كل الليمون المتوفر.. وهاتلك كم رغيف خبز ساخن من الي بحبه قلبك.. وتذوق.. يااااعيني ستشعر وكأنك دخلت إلى الجنة.. 😂😂

وضروري تجربها بايتة، ولا بروح عليك نصف عمرك.. 🤣

شخصيا عندي طبق خبيزة من البر اجمعها بيدي واعدها عن خرووف مشوي..

صحتين وعافية..

ونلتقيكم مع طبق آخر.. إن شاء الله
:شو رايك يا مسعودة الطبق الجاي يكون (ششبرك باللحمة) يميميم 😁

بفكر بالموضوع يا مسعود😤 .. 🤔

:شو تفكري ما تفكرب، مليش دخل بدي ششبرك هسا فورا😡

💥💥💥👊🤕

: شو بدك حكيتلي 😌هههههه😁🤭
: 🤕

[محمد داود العونه]

فكرت.. خلينا نأجل طبق الشوشبرك للمرة الجاي، بدنا طبق خفيف لطيف سريع الإعداد وصحي في نفس الوقت، لا يحتاج مكونات كثيرة ووقت طويل.. 🤔
: طيب شو رايك (مفركة بطاطا مع بيض )؟

.. 😁😁
يلااا جهزلي المطبخ..

[محمد داود العونه]

نحن نعود معكم أعزائنا المشاهدين الصائمين، نعود اليكم وكلنا سعادة بأنا معكم نعد اطباقا لا حلول لها غير غير رفع الاكف نحو السماء والدعاء : اللهم لا نسألك رد القضاء بل نسألك اللطف فيه.. 🤣


المقادير :

1/ بتروح على محل خضار، اختار ٤ حبات بطاطا كباااااار وقاسيات هيك كثير
٢ / راس بصل كبيييير
٣ / كم فص من التوم
٤/ كوب من زيت الزيتون
٥/ مقلاية كبيرة الحجم
٦/ ملح طعام
٧/ ٣ بيضات أو زودهم ل٤ إذا حاب..جعل لحدا حوش 😁

ظل اشي.. 🤔

الإعداد :

نقشر حبات البطاطا بهدوء وببال طوييييل، مش تخلص البطاطات مع القشر.. قشر كويس يا مسعود وبامانة.. ومن ثم نغسلهم جيدا، نقطعهم على شكل مربعات صغيرة لمتوسطة الحجم.. حاول أن يكونوا على شكل مربعات.. بعرف الموضوع مش سهل، ومن ثم نضعهم في صحن يرتاحوا اشوي..
نفرم راس البصل جيدا والتوم ، ونضع البصل في المقلاية ونسكب عليه زيت الزيتون.. ونحوسه حوسا جميلا وبعد دقائق نضع التوم المفروم ومن ثم نسقط مربعات البطاطا فوق البصل، نزيد من زيت الزيتون قليلا، نقلب المكونات.. نرش رشة من الملح ونوطي على النار للمستوى الأخير نغطي المقلاة.. ونتركها عشر دقائق.. نعود ونقلب المكونات ونهرس المربعات كلما ذابت.. حتى تذوب مربعات البطاطا بشكل كامل.. وإن شعرنا بأننا بحاجة لقليل من الزيت نصيف بعضا منه.. وحينما تستوي البطاطا نفقس البيض فوقه نرش قليلا من الملح والفلفل الأسود عليه نتركه دقيقة دون تقليب ومن ثم نقلبه مع بعض.. لمدة خمس دقايق.. وهكذا يكون الطبق جاهزا لتناول.. ✌️😁
نضع المفركة في صحن كبير، مع بصل أخضر وكم رغيف خبز ساخن وروووح بالصحن بس تبعدش كثير بلاش تضيع هههه

ونااام بعديها نوما عميقا لم تجربه من قبل هذا الطبق..😁
😴😴😴 والله نعست على السيرة هههه


صحتين وعافية و الجاجة حافية.. 😁

مع طبق آخر من برنامج عمو من شااان الله موت خلينا نخلص منك ومن الزنوب الي بتعملها بالطماطم المسكينة 🍅🍅🥺 هههههههه😂

:مسعودة اديني طمطماية صغننة
😤💥💥💥💥👊
.
.
😂😂😂😂😂😂

[محمد داود العونه]

: /مسعودة، بدنا طبخة تليق بصديقنا مسعود، الراجل شغال من الصبح بكير تحت الشمس الحارقة منكب على وجهه ههههه

//: 😤، ما صدقت على الله أخلص الجلي وانظف وارتب المطبخ من عمايلك السودة، جاي دلوقتي تعزم صاحبك..

/: اشششش وطي صوتك الراجل قاعد بغرفة الضيوف بلاش يسمعك..
//: مش طابخة حاجة النهردة خاااالص ، خلاص وصي أكل جاهز 😤 وخلصنا منك ومن صاحبك 😡

/: كده يا مسعودة تفشليني.. طب عشان المشاهدين 🥺🥺

//:.. 🤔، ماشي حمشيها المرة دي عشان المشاهدين بس..

/: حتغدينا إيه يا جميل أنت يا مسمسم 😘

//:.. عووووووووه محااااااااشي 😁😈، محاااااشي دوااالي وبيتنجاااان، عووووو


/: ايييييييه محاااااشي 😭، حولع بنفسي وبمسعود دلوقتي.. كله إلا المحاااااشي بموت منها..


/: يلا بينا بسرعة يا مسعود نهرب يا خويا، إجري يااااااا مسعود..

//: هو في ايه والعزومة؟! 😳

[محمد داود العونه]

ونعود معكم أعزائنا المشاهدين الصابرين على الاذية والجراااح هههه والليالي الملاح والشمس الحارقة والأجواء الخانقة، عدنا إليكم مع البرنامج الترند هههه دلع كرشك مع الأبلة مسعودة وعمايلها السودة هههه

طبق اليوم صحن زر مع بطاطا بالفراخ..

/ تنويه! 🚫⛔
الطبق القادم فوق سن 🔞ال٩٠ ههههه عشان اذا اتكل حد على الله نقول وقتها أهو ارتاااح من الحر داه هههههه 😂😂

نبدأ الحلقة بقراءة الفاتحة على الأرواح السابقة ههههه

[محمد داود العونه]

تراااا ترا ترا تراررا را را
: وأنا كل ما قول التوبة يبويا ترميلي المقاااااادير يا عيني.

المقاااااادير :
1/ كاسة كبيرة من الأرز، أي نوع مش مشكلة المهم المبدأ ههههه

٢/ ملح طعام، فلفل أسود مطحون، بهارات دجاج (ثومة مع كزبرة) ، ليمون

٣/ زيت قلي
٤/ قطع الدجاج،/ حسب العدد
٥ / حبات من البطاطا كبيرة الحجم / حسب العدد
٦/ كل الطناجر الي بالمطبخ ههههه🤣
٧/ بصلتين كباار

ظل اشي.. 🤔

الإعداد /

أول اشي قبل ما ننسى بننقع الرزات بالماء الدافء نغمرهم ونتركهم، ننظف قطع الدجاج ونغسله بالماء مرات عديدة نضعه في طنجرة ونعصر عليه الليمون نتركه قليلاً ونعيد الغسل مرة أخرى، ونعصر عليه الليمون ونعيد الغسل ونعصر الليمون ونعيد الغسل ههههه، ثم ندعكه بالبهارات والقليل من الشطة.. 🤔 ونتركه منقوعا بالبهارات، ونغسله مرة أخيرة ونسكب عليه الماء من ثم نضعه فوق النار ليغلي قليلاً.. ونتركه هكذا..

نحضر حبات البطاطا ونقشرها نقسمها مربعات كبيرة الحجم ونتركها جانبا قليلا..

نحضر الطنجرة ونقطع البصل شرحات رفيعة ونسكب عليه الزيت ونحوسه قليلا.. حتى يصفر، نضع مكعبات البطاطا فوق البصل ومن ثم نسكب عليه الماء الساخن وكوب من ماء الدجاج المغلي ونحضر قطع الدجاج ونضعها مع البطاطا.. ونتركها تتقلب مع البطاطا مغمورة بالماء ونغطي الطنجرة..ونقلل من النار تحتها إلى المستوى الأخير..

هسا بنرجع للرزات الحلوات هههههه بعد ما انتقعوا..

نحضر طنجرة صغيرة الحجم وركزوا معي هون كويس العملية كثير دقيقة وتعتمد عليها نجاح حياتكم المطبخية ههههههه

بنجيب الزيت بنسكبه وبس يسخن بنصفي الرزات من المي، وبنسقطهم فوق الزيت وبنقلبهم مع رشة ملح دقيقة مش أكثر ثم نأخذ نضيف الماء كل كاسة رز بدها كاسة ونصف ماء واحسب عاد أنت ههههه، ممكن تضيف من ماء الدجاج لو حاب الرز دسم الطعم، وعشان ما تحط مكعب ماجي او نص مكعب.. تكثرش ماجي بلاش يطلع معك الرز لونه أصفر ههههه بتضل تقلب الرز ليغلي بعديها بتوطي النار على الآخر وبتغطيه عشر دقايق.. مش كل دقيقة تشيل الغطا وتتفرج..بخرب بعدين وبزعل منك ههههه، بعد عشر دقايق برأس الشوكة قلبه شوي وذوقه مستوي ولا بده كمان..

بنرجع ل البطاطا والدجاج، وبنقلبهم اشوي حتى تنضج البطاطا والدجاج.. نضيف الملح والبهارات..

وهيك بتجيب صحنين، صحن رز وصحن بطاطا مع المرقة والدجاج... واعطيها وانت تغني رفت، رفت عيني تريد تذوقه ههههههه

✌️😁


البرنامج غير مسؤول عن أي أعراض جانبية ههههه وكل واحد يوخد باله من فلوسه ههههه

.
.
. مع تحيات ابلة مسعودة
وصحتين وعافية
وعلى فكرة المسبة بتلف بتلف وبترجع لصاحبها هههههه😂😂

[محمد داود العونه]

: مسعودة، ياااااا مسعودة انتي فين 🤔 معقولة نايمة؟!..
مسعودة :💤 😴💤
: بجد!!، 🤫🧨🧨💣💥💥
: 🤯، 😡

/:😂😂🤣

🤛🤛💥💥
🤕🤕