لقاء صحفي تجريه قناة الخوازيق الفضائية

[مؤيد أبو سعادة]

لقاء صحفي

المراسل: مرحبا يا حجة، ممكن اندردش؟
الحجة: يا مقلعط احكي اللي بدك اياه و انقلع من وجهي، مش شايفني قاعدة بتشمس
المراسل: اوكي ... انا مراسل من قناة الخوازيق الفضائية و حابب اعمل معك مقابلة!
الحجة: ول عليك ... و على اسم قناتك ... هو الواحد ناقصه خوازيق اكثر من اللي هو فيها
المراسل: يا حجة ... انا ما الي علاقة بهالموضوع ... هيك بده المدير العام
الحجة: خازوق ... شحبار ... قرد ... مش مفرقة معاي ... شو بدك على الصبح
المراسل: احنا قناة اخبارية و بدنا نعرف رأيك في اللي بيصير في غزة
الحجة: آه ... يا خالتي قرد يشرب اليهود والعرب مع بعض والله يلعن الحكام اللي الحمير أحسن منهم
المراسل: عفواً يا حجة احنا على الهوا؟
الحجة: قرد يشربك انته الثاني مش عيب عليك تتخوث علي هيني قاعدة على الأرض ومش على الهوا!
المراسل: ياحجة عيب العالم كله بيتفرج عليكي هسه!
الحجة: يا فضيحتي الفضيحة و يا ويلي!!
المراسل: خير يا حجة مالك شو صار!
الحجة: روح روح بلاش الحج يقوم من قبره ويطخك !
المراسل طيب ليه؟
الحجة : فرجت كل الناس علي أي هو أنا عارضة أزياء، فعلا انكم قناة للخوازيق

[د.سامر سكيك]

لذيذة يا مؤيد
مررت عليها صدفة بعد يوم شاق للغاية..
هذا الحجة تتحدث بلسان العوام، ولها منطق الملوك..

[نايف ذوابه]

واحنا يا مؤيد مش ناقصنا خوازيق ...

حياتنا صارت في مأزق لأنها خوازيق متتالية ... لا نكاد نصحو من خازوق حتى يطل برأسه خازوق آخر ,,,

نسأل الله العافية ... كلام حجاتنا عفوي وبريء يذكرنا بحياتنا العفوية البسيطة التي افتقدناها وأصبحت أحلاما رومانسية في حياتنا ... ليت الزمان يعود فأنزوي بشويهات أرعاها بعيدا عن حياة أصبحت ملوثة بالاستهلاك والتكلف والنفاق على كل الأصعدة ...
وكل خازوق وأنت بخير يا مؤيد ...!!

[تحرير أحمد]

سلمت يدك
نشعر بالحنين لهذه اللهجه وهذه الفطره السليمه

تحياتي

[ايهاب ابوالعون]

والله حياتنا كلها خوازيق ... و شعار الصمود هو الله لا يبلينا بخازوق ليس له أول ولا آخر