تغطية كاملة..تعرية شاملة!

[محمد عرفة النجار]

كلها ومشغول بهمو وأيامه
وما خلف ليه حظه وازمانه
ماعارف يطوي ولا يطلق أكمامه
وأنت ياللايم زايد علي باللومة
عايب حرام احشومة...
خليني بعدا من هنا لغدا
يفرج ربي مول الرجا
زين العطية سبحانه
خطفوا حقوقنا ظلمونا فيها
طيور طاروا علاو مابانوا
احتجناهم غابوا مااتصابوا
امشات الصابة في ازمان الحبحابة
تصحرات التربة اتعراو الجذورة
كنا في العقبة ولينا في الحذورة
عنداك رد بالك من العقوبة
ياك آلغابة خربوك الحطابة
أغصانك الراشية يوطاو عليها
اصحاب المدافي الرزق الفايض
والحظ الزاهروالوافي...
ياذيك الخيالات الغادية
أنت عايشة ولا مقبورة؟
الكذابة شطبوا البحور بالشطابة
رهنوا لبلاد والعباد للغرباء
هاي كلاس هود كلاس
تبين كلاس يبان كلاس
بين الكلاس والكلاس
تحسب اشحال من اكلاس
تنمية شاملة تعرية كاملة
رتب الكراسة للسوسة والساسة
آي آبلادي عراوك لكل اشماتة
غريب الدار دخيل وزهواني
ولفو الدفا والكراسة
ولفو الشكايرالوافية
تمرغو في العيش الهاني
أغلى الرخيص ورخاص الغالي
ياك آلعالي كلام الموالي ولا بالي
آي آبلادي شحال سترت وخبيت
واشحال يقد نخبي ونستر
زمان التعرية كل شئ تعرى
آي آبلادي حني علي شوية
آي آبلادي هاذوك أولادي
طرف من أكبادي،طعنوك آبلادي
واعطاو بالصدة هاذوك العدا
توجهوا للعدا يداويو الكية
آه على الكية أشكون اسباب الكية
شعب النية مابقات نية وفين النية؟!
وانا بعيد مقصي من حروفي
ساكت نسجل في تقلاب ظروفي
وأنا الفلاح العارف يا..حسرة
وهاذيك نعجتي سولوا خروفي
الفقير من قلة شئه يكدد في اطرافه
وقلة حيلته يعض في اجنابه
خشبة واقفة منجورة
تحسابها صحيحة وهي منخورة
ضحكة وتسلية لأحبابه وأصحابه
السواد مطلوق على أربعة
يعيث مثل الجراد في الفدان
ينتف وراه ويحصد اللي قدامه
هذه حالة يابلادي وفيك تحديت وبيت
وكبرت حلم أولادي
الله الله عليك يابلادي
هاذ القليل من الكثير
نقول واقف ولا غادي
كل شئ مراجل مرجل يغلي
وكل الخير فيك وافر
وأنا نشوف وعلى المكشوف
كل شيئ باين واضح ظاهر
ماحنيتي علي وأنا صغير
مانصفتيني وأنا راجل كبير
أجناو عليك وجنيت عليا يابلآدي
ياك احنا أولادك كاملين
وعلاش شي بضرعك تسقيه وترويه
وشي برجليك وقرونك تنطحيه
للحافة ولا للتلافة ترميه و تدحيه
كيف الغريب كلاب الحومة
بنباحها تفضحو وتقيح عليه
واه يابلادي نشكي حالك ولا حالي
العبيد ولات أسياد وموالي
بغيت الجو يتغير تصفا الخواطر
بغيت تصب الشتاء يابلادي
ينبت الربيع في القلوب ينور
يكبر الشجر يحيا الخير ويموت الشر
أتعدل الكفة ويكون الكل مساوي
ضاحك مبشور،بالستر والظاهر وبالعلالي!!