كلمتين للاخوان

[عبد الحميد بدوى]

كلمتين للاخوان

ياترى لو شعب مصر
راضى ومبسوط
من غير مرسى
ومن غيركم
دى حاجة تزعلكم ؟؟؟؟
أومال فين نحمل الخير لكل الناس
ولا هو كلام وشعارات وخلاص
ما يمكن الخير محجوز بسببكم ؟؟؟؟؟؟
ربنا عالم بحالنا وحالكم
ياريت بقى تريحوا
وتشتروا دمغكم
أوعى تكلمنى بأسم الدين
الدين برىء منكم
ومن عمايلكم
أنا كنت غلطان
لما كنت بدافع عنكم
أنا أتغيرت لما لاقيت
الكرسى هو اللى
بيحدد مصيركم
ومصلحة البلد
أخر حاجة تيجى على بالكم
أنتم اللى كتبتم بأيديكم
نهايتكم
وكشفتوا نفسكم قدام الدنيا
ومعدش حد بيصدقكم
مع أنى عارف
أن دى أكتر حاجة بتضايقكم
بس صدقونى الناس ما صدقت
أنها خلصت منكم
أقول أية ربنا يسامحنا ويسامحكم
أوعوا تفكروا ان حد تانى هايسمعكم
خلاص الشعب كرهكم
أنا شايف أن انتم ظلمتوا نفسكم
قبل ما يكون حد ظلمكم
ما تكلمنيش عن انقلاب عسكرى
يا مفترى
الشعب اللى قلبكم
الشعب اللى فى سنة كره نفسه
أنه جابكم
صلح غلطته وبيقولكم
لقد نفد رصيدكم
سيبوا الشعب يطهر نفسه
بنفسه من ذنوبكم
بس انتم ما تشغلوش بالكم
وارجعوا لبيوتكم
وان شاء الله البلد بكرة هايتعدل
حالها من غيركم


الشاعر
عبد الحميد بدوى