يا ليله م الرحمن

[مسعدالنحلة]

ـــ
ـــ
ـــ
ـــ
ـــ
ـــ
ـــ
ـــ


يا ليله م الرحمن
ـــــــــــــــــــــــــــــ

يا ليله م الرحمـــن يا ليلة القـَدر

ياللي نهـــارها شمس زى البدر

نـَدَرْت أستنـَّـــى ووفـَّى النـــدر

وادعي لربي يحمي ثورة مصر

من اللي نــــاوي فجأه يسرقهـا

عامل مـــلاك لكن مخبِّي الغدْر

ــــــــــــــــ

يا ليلـــه عمري فيهـــــا باتمنـَّى

حاجات لا ليها طعم ولا معنـــى

فاكرني هسعد يـــــــوم وهتهنـَّى

أو هنبـِسِط وكأني في الجنـــــــه

والناس هنا ضايعه مع حقوقها

من اللي جـــار بالظلم واتجنـَّى

ــــــــــــــــ

يعني السعــــاده تبقـَـــــى حُريَّه

والجنه من غيرها ماهيش هـِيَّه

والنفس ليلــــة قـَدْرنا الجايَّـــــه

مِسْتـَنـْظـــــــرَه ومبيِّتـَـــــه النِيَّه

تكـْسَر ف طوق من صُلب طوَّقها

وقيود سنيـــن رابطه علـــى إديَّه

ــــــــــــــــــ

يا ليله غيـــر اللــــي قابلناهــــا

طول عمرنا ما ف مره شـُفناها

رح ندعي فيها دعوه قولناهـــا

يا رب تحفظ ثـــــوره ثورناها

وتصحِّي ناس م النوم وفوَّقهــــا

تفهم وتعرف أصل معناهـــــا

ــــــــــــــــ

يا رب خـَرَّج مصر م الغـُمَّــه

يا رب جَمَّع شملِنــا ف أ ُمَّـــه

خلينا مِتحاوطين على كلمـــــه

بعد امَّا زلنا من البلد ضلمـــــه

بشعله خوفي تكبر وتحرقهـــــا

يا رب إحفظ وابقِـــي ع النِعْمَه

ــــــــــــــــــــ

قـُمنا بثوره هزِّت الميــــــــدان

خليتني احِس اني بقيت إنسـان

والرأى حُر وحقِنا مِنـْصـــــان

لاكِن دا منـَّه وفضل م الرحمن

علشان نشوف حُريَّه وندوقهــا

ونزيل بإيدنا السجن والسجَّان

ـــــــــــــــــ

يا ليله كانت ف السنه دي اتنين

ليله ف يناير واللي بعد يوميـن

كـُنا ف يناير ثورنا بالملاييـــن

فاطرين صحيح لاكِننا جعانين

يومها دفعنا الشمس لشروقهـــا

واليوم بندعي نبقـــى متفقيـــن

ـــــــــــــــــ

**********