وطن سكران

[محمد رمضان هدايه]

لون الحليب إغمّق
كل البقر عاجفين
حبّات عيون الوطن
مصلوبة ع العمدان
كل الطيور غربان
حلم البنات مابقاش
ف الطرحة والفستان
حلم البنات مشنوق
من بدرى ع الرصفان
وانا اللى قلبى رجع
فاتح شرايينه
شوفت القمر مسموم
على باب محبينه
إديته بوسة حياة
قام اتنفض م الموت
مصمص فى دمى الكتير
ورمانى ع السكة
ضحك الوطن ضحكة
زادت بقت هزيان
شوفت الوطن تعبان
ملفوف على وسطى
واتشعلق الكتفين
ضهرى العنيد وطّى
شكلى صبح نصين
حاسب هنا ياسطى
ياسطى هنا حاسب
وطنى عقيم من زمن
والحمل كان كاذب
نزّلنى فى الصحرا
ما بقاش هنا مطرح
ح ارسم وطن سكران
واشرب واتطوح
يمكن افوق م الهوس
لو لحظتين واعرف
وطنى ده حتة ورق
يمكن كمان….
أضعف

[سليمان محمد شاويش]

الأخ محمد رمضان تحياتى واحرامى
جميله كلها احساس وكلماتها رنانه
دمت بخير

[علي قابيل]

الزجال الشاعر
محمد رمضان هدايه
قلمك جميل جدا ووصفك للوطن بالحليب الذي تعكر وتغير لونه دليل على مصريتك الأصيله
أشكرك على هذه الرحله التي أخذتنا فيها إلى عالمك
عاطر التحايا
الشاعر / علي قابيل

[رانيا حاتم أبو النادي]

شكرا لجميل سطورك
ولكن الوطن يبقى جميل رغم كل شيء
تحيتي

,
,