ومضات كتبت بقلم الشاعر الشاب علي يونس

[علي يونس]

حبيتك قبل من جان عمرك يوم
وحليت الكلب يوم السكنته
كالولك نساك وصدكتهم ليش
ددك باب الكلب يطلعلك انت

نتحمل بواجي وحسرة الليل
ودرب كلش خطر لكن مشيناك
كلنالك نحبك واحجي شتريد
حجيت انت بصمت لكن سمعناك

اذا صابك جرح يعني اني مجروح
واحد صرنه احنه اجروحك اجروحي
واذا رايد احضنك سهله مامحتار
لذلك كيفت كمت احضن بروحي

شفت الحلو واكف يغسل الباب
خدركلي اعله بعضي بهمس حسه
ومن كد ماحلو من عنده غار الباب
كض الماي بيده ويغسل بنفسه

مو كلمن يسولف يعني بالطيب
ولا يكدر شخص ياخذ مكاني
كلمه انت اصبحت محد نطق بيك
وصرت كلمه بحلك ميت حجاني

يل رمشك سمه وعيونك الناس
لاتبعد عليه اكليبي يبجي
ومن كد جمالك مادريت الصار
طفل بكماطه شافك كام يحجي

صفنت الكلب يوم الرحت منا
وطبع الصفنه موت وانت تدريني
عشكتك من جنت جاهل واشيلك دوم
كبرت بيا بخت رايد تبجيني

[حيدر الياسري]

الرائع علي يونس
قصيدة رائعة حملتي بين ضفاف الهور وشوارع الناصرية ودفئ السماوة
جميل حين تقول...............
حبيتك قبل من جان عمرك يوم
وحليت الكًلب يوم السكنته
كًالولك نساك وصدكًتهم ليش
ددكً باب الكًلب يطلعلك انت

تبقى دوما جميل ايها الرائع امنياتي لك بالموفقية والابداع دوما