علي فكرة /شعر : عبدالناصر علام

[عبدالناصرعلام]

علي فكرة شعر :عبدالناصر علام _ مصر

علي فكرة مش ذنبي
ماخدعتكيش
ولا جرّحك قلبي
إنتي اللي عشتي الوهم للآخر
ورسمتي شوق وحنين
ورسمتي طوق
حوالين رقبتي والحجج واهية
وانا اللي حر طليق
ينفعشي يسحبني .. جفاف الريق
للضلمة أو للضيق
لو حتي كنتي بجد عاشقاني
إيه اللي درّاني
إيه اللي أفهمني
إحساسي مايخيّبش
عشقك مزيّف وانتي برّاني
ودموعك الفدادين
بتزيد ملوحة وطعمها يخوّف
فانا خوفت من أول ما شفت ..
الضحكة مصنوعة
والغنوة مصنوعة
والسكّة شبه سراب
والدكّة من عضم الصحاب والأهل
ما خدعتكيش عن جهل
انا كنت عارف حقيقتك ..
قبل ما تبوحي
سبتك تروحي لأبعد المسافات
وتكّثفي المشاوير
سرّك في بير عندي
ومالوش بيبان عندك
زي "السبيرتو " يفر..
يتوزّع
ولامرة صونتيني
ولامرة صونتي السر
الحضن كان ع الوش من برّه
فما كانشي أمن ودفء ومسرّة
شكشكتي قلبي برمشك الإبرات
وخرمتي بعنيكي النيران .. روحي
وقعدتي مطراحك
فلا تقدري تقومي
ولاتقدري تروحي ..
المكان" ف " حصار
مش عارفة مين وياكي ..
دلوقتي
مش عارفة مين هاجر
ولا مين من الأنصار

* * * *

[سعيد حامد شحاتة]

الله
يا عبد الناصر
القصيدة جميلة جدا أنت مبدع عبقرى
ايه الروح العالية اللى فى القصيدة دى وايه الفنيات اللى مالهاش زى دى وايه كمية الحنين دى
جميلة يا عبد الناصر بحجمك والله
تحياتى لك ولابداعك

[عيسى عدوي]

أخي الشاعر الجميل عبدالناصر علام
أهلا وسهلا بك في أقلام العزيزة ...
نتمنى أن تطيب لك الإقامة بين أهلك ومحبيك ..
وأن نستمتع بكل جديد ورائع من شعرك البديع

قصيدة جميلة ..تبشر بشاعر جميل ..

تحيتي لك

[عبدالناصرعلام]

المبد ع الجميل / سعيد شحاته
لك مني كل الود وشكرا علي مرورك علي نصي الشعري وأخجلتم تواضعنا مع تمنياتي بدوام التواصل
عبد الناصر علام

[عبدالناصرعلام]

الأستاذ الفاضل / عيسي عدوي
نائب المدير العام للمنتديات
تحية طيبة وبعد
شكر ا لكم لإتاحتكم الفرصة لنا في منتدياتكم المحترمة وشكرا علي حفاوتكم بي
مع وافر الاحترام والتحية
عبد الناصر علام