إلى أمى الحبيبة

[دصبرىإسماعيل]

بقلم دكتور/صبرى إسماعيل
إلى أمّى الحبيبة

بكتب لك يا حبيبتى يا أمى
من وسط بحور الشوق لحنانك
وألوان الورد فى بستانك
ولكلمة حب فى قلبك
كانت دايما شايفانى
بتهزّ مشاعرى ووجدانى
بتطبطب على كتفى المحتاج ليكى
وأشتاق لساعات أبقى ف إيدك
وألا قينى فى قلبك وعينيكى
متلهف مش عارف ليه!
وبأحس أنّى مقرّب لدفاكى
ولحضنك وعيون واخدانى
والنبض الساكن جوّاكى
وأفتكرك لمّا يجينى الفجر تصحّينى
وتصبّى على عيونى الميه
لأجل أشوفك وأروح للنور
ما هو نورك باين فى جبينى
ودموعى النازلة تصحينى
وأرجع وبسرعة
وكأنى فى غربة بتكوينى
وأفتكرك لمّا تناولينى كتابى
ووداع الصبحية فى بابى
فاكرة يا أمى
لما البرق أتفجّر فوق حتتنا
وأتسمر قلبى من الخوف
ولقيتك لفّانى فى أحضانك
ولقيتنى بشوق باجرى عليكى
وبصوتك بتنادى عليّه
أسمع أوعى تقرب م البحر
اللى بيسرق فرْح عيال الحارة
وأدخل جوه البيت مع صفارة الغارة
إيدك يا حبيبتى شالت همّى
بتغذينى والجوع ما يكسّر مجاديفك
بتدفينى والبرد ماهمك ورديفك
وفانوس رمضان
والبمب بتاع العيد
ولاّ المراجيح والبخت فى كيس الحاج سعيد
أه لو أرجع تانى يا أمّى
وأتمرّغ وبشوق على بابك
ودموعى تغرق أحضانك
واحشانى ورب الكعبة
أنت وحكاويكى عن البطة
وأميرة البحر الجنيّة
ومسلسل خمسة العصر
وفطيرك كان ليّه هدية
وأحلامك أنّى أكون دكتور
وكبير العالم فى ظنونك
أو طيار فوق اى سحابة
ومفتول العضلات فى الغابة
واحشانى فى لهفة قلبك
لمّا تلّف عساكر الدورية
من رعشة قلبك وعليّه
مشتاق لك
وأنت بتزرعى فيّه صلاتى
وجميع أركانى وصيامى
وأنت بتصنعى أحلامى
وبتعملى من دمع عنيكى
والعرق المرسوم بجبينك ودعاكى
رسالة
وبرغم الحالة
واحشانى يا أمّى بكل الشوق
لكن بأكتم أشواقى
وأدعى يارب أكون وياكى
فى جنة ربى
يا كل الحب وزهرة قلبى

[عيسى عدوي]

أخي العزيز صبري حفظه الله
مهما قيل في الأم فلن نفيها حقها ...ولكن يبقى هذا الشعور النبيل والإحساس المتدفق الذي لا ينضب ..وليس لنا إلا الدعاء ..
قصيدة رائعة ومشاعر صادقة
تحيتي لك ايها الشاعر المتميز

[د. حورية البدري]

حَققت مُناها
وبقيت دكتور

ضحكتها الصافيه انا سامعاها
بتقول صبري
ومازالِت رَغم البُعْد قَريبَه
ومْحاوْطَه عَليك بدُعاها الطَيِّب
بتْشُق الليل وتجيك
وتسَمّي وقلب مُناها / الله يحميك

شايفاك ومعاك
وف كُل مكان تستنى بسمة قلبك
وطريق يِرْضِي عَليكْ رَبَّك
أحلامها مازالِت جنبك
فاتْبَسِّم لها مِنْ قلبك
الله يِراضيك

***

دُمت بخير د. صبري

ودام جميل الإبداع

تحياتي

[إياد حياتله]

قصيدة جميلة أخي د صبري

والتحية للأمهات جميعا
وخصوصا
أمهات الشعراء

[دصبرىإسماعيل]

المبدع الرائع عيسى عدوى
دائما كلماتك رقيقة
اشكرك يا استاذنا الكبير

[دصبرىإسماعيل]

الكاتبة المبدعة حورية البدرى
مرورك يسعدنى لانه من خبيرة مبدعة

[سعيد حامد شحاتة]

الله
من اجمل العبارات اللى ممكن تهزك فى الشعر بأنواعه عبارة فيها كلمة محبة لست الكل
دمت مبدعا

[وفاء أمين]

الشا عر/ الدكتور صبري إسماعيل
الأم
هذا المحيط الهادئ
الذي ننهل منه حبنا وعواطفنا النبيله
ومواقفها التي لا تغيب
أجدت سيدي في تعبيرك عن حنانها
في المواقف الخاصه والذكريات الحميمه
وتقبل مروري بكل الموده

[دصبرىإسماعيل]

المبدع سعيد حامد
اشكرك جدا على مرورك

[دصبرىإسماعيل]

المبدعة وفاء امين
تحياتى اليك واشكرك جدا

[دصبرىإسماعيل]

وأشكرك أيتها الرائعة وفاء أمين

[دصبرىإسماعيل]

أشكرك شاعرنا المبدع
ولك كل التحية