روان

[محمد رمضان هدايه]

إحلف إنك
لما ف نفس السكه تعدّى
مش ح تفكر فيها
إحلف إنك
لما تشم العطر الطالع
من شجر اليوسفندى
مش ح تفكر فيها
إتمردّت عليه وحلفت
فجأه لقيتنى فى نفس ميعادها
رايح نفس السكه لواحدى
فجأه لقيتنى
حتى ف عز الصيف بتنفّس
من عطر اليوسفندى
واما لقيت واحد قدامى
وفُقت لنفسى
مد الإيد بإشارة سألنى
ساعتك كام؟
من غير حتى ما ابُص ف ساعتى
قلت... روان

[داليا فاروق]

جميلة هذه الروان
استقينا منها ومنك
شربة أدب
كلمات رقيقة
لكن أعتقد الوزن به بعض الكسور

تحياتي لقلمك

[حسام حسين]

أيه يا أبنى ده؟ وصلت بيك الجراءة أن تقول أسم الدكتورة "روان" بالشكل ده
أنت أستأذنت منها قبل النشر ؟
واضح أنك مش حتجيبها البر ....
دلوقت "روان وبعد كده أشجان و رزان ثم حنان وتصبر شوية وتفاجئنى بـ عثمان وبعدين ؟
على كل حال انا فى انتظار ابداعك دائما ..

[محمد رمضان هدايه]

الاستاذة العزيزة / داليا فاروق
دائما تسعدينى بتعليقك على قصائدى
اما حكاية الوزن اللى فيه كسور لو مش عاجبك اوزنى بره
انت اللى ميزانك معيوب وحبلّغ عنك مصلحة الموازين
وبعدين جرام والا اتنين مش حيفرقوا
تقبلى خالص تحياتى

[محمد رمضان هدايه]

الحبيب حسام
لا والله ما استأذنتش
حتى خربشتنى فى دقنى بنت الايه دى
بس قصيت لها اظافيرها
وسايبها بتعيط وشبطانه فيّا
ما تحرمنيش من تعليقاتك وافيشاتك اخى الحبيب

[محمود جمعة]

ليست باكورة اعمالك ..
و أما الوزن فأنا اتفق مع ما ذكرته الاستاذة داليا
دمت

[محمد رمضان هدايه]

الاستاذ/ محمود جمعه
ما فيش مجال للاختلاف او الاتفاق مع الاخت داليا
المسألة ابسط من كده بكتير
دى قصيدة لبنتى روان اللى عمرها سنتين ونص
وما تزعلش ح ارميها...القصيدة مش بنتى
بس ياريت تحط ايدى على الكسر اكون شاكر

[محمود جمعة]

ربنا يحفظ لك روان و قصيدة روان
و لكن يبدو أنك لا يعجبك تمردها اللذيذ فجاء كسر فى الوزن فى
إتمردّت عليه وحلفت
و ده مثال .. و إن لم يعجبك كلامى فعلى رأيك قبل ذلك ( هوزن برة) و مش هزعلك و لا ازعل نفسى و لا ازعل الميزان

[محمد رمضان هدايه]

الاستاذ / محمود جمعه
يا عم زعل ايه دى كلها مجرد مداعبات
ولكن عندك حق فانا اخطات فى التشكيل ووضع الشدة
هى على الراء وليس على الدال اقرأها
بمعنى انى انا اللى اتمردت وانا اللى حلفت
حتلاقى الميزان طابب انا كده فى بيعى بحب اكسب الزبون
تحياتى اخى الحبيب

[وفاء أمين]

الشاعر /محمد رمضان
قرأت أشعارك ووجدتها راقيه في معناها ولكنك تميل إلي المباشره
في التناول وتميل أيضالإعلاء الذات في إستخدام لفظة (أنا)بكثره
وهذا لا يعيب النص طالما هناك ضروره لذلك
عموما الوضوح والصدق هما البطل في قصائدك وأرجو أن تتقبل مروري بصدر رحب

[محمد رمضان هدايه]

الاستاذة / وفاء امين
انا سعيد جدا بمرورك وتعليقك بالطبع
ولكن يا اختى الكريمة الانا فى الكلام ليس بالضرورة ان تكون اعلاء للذات
ربما لشئ اخر اما حكاية المباشرة ربما لان القضية لا تحتمل الدوران
ومع ذالك ما ترينه مباشر هناك من يراه غير ذالك
ولكن الغريب انك تقولين قرأتى اعمالى ومع ذالك اجدك لم تجدى سوى هذه القصيدة للتعليق عليها فهل لم يعجبك باقى اعمالى ؟
وبما انك تتكلمين عن المباشرة فهل علمتى اختى العزيزة ان هذه القصيدة لابنتى التى لم تتجاوز عامين ونصف
اشكرك جدا وارجو دوام التواصل
شرفنى فعلا مرورك

[وفاء أمين]

أخي الشاعر الكبير الأستاذ /محمد رمضان
لك كل الشكر والعرفان لمرورك الجميل وحرصك الأجمل أن تكون أول المشاركين لقصيدة (صندوق بويه)..
أما عن مشاركتي لقصيدة (روان)
فأنا لم أقصد هذه القصيده بالذات ولكن تعليقي كان عموما لأني قرأت فعلا مواضيعك
وأختلاف الرأي لا يفسد للمشاركات قضيه وأنا أتقبل النقد بصدر رحب لأني أتعلم منه
حتي لو كان لمن هو أصغر مني سنا وربنا يخليلك روان وتلهمك كمان كمان

خالص مودتي ..الشاعره وفاء أمين عضو إتحاد الكتاب المصري