حاجات يامه

[سعيد حامد شحاتة]

قصيدة ()(حاجات يامة
شعر _ سعيد حامد شحاتة
*****
بنتغرب
وحضن الشمس يتدارى ف خطاوينا
ونتقابل
نبص لبعضنا حبة ونتصعب
عشان كدبة قالوها اتنين ما عشقوش بعض زيينا
وأعيش فاكرك
وراسم بين رموش العين ملامح كدبة هدامة
وتنسينى برغم انك ما زلتى بتعشقى فيا حاجات يامه
كلام الشعر والتنكيت وغنوة تمللى أغنيها لثومة ف فيلم سلامة
حاجات يامة
سجايرى الفرط لما أكتب نكت سكة
وضحكك لما بستأذن ولما تقولى رايح فين وأقول هفتح بلاد عكا
وجيبى اللى اتزرع جواه شوية قرشينات فكة
وقلبى اللى اترسم بسمك على الحيطة وع الدكة
وضحكة تمللى أطلعها وأخبيها
وأخاف يسرقها ديب واقف بيسرق ضحكة العشاق على السكة
وشخبطتى على الكلمة
وخوفنا من الفيران فى الغيط ومن حواديتنا فى الضلمة
ومن شكى ما بين الرسم جوا ملامحك النيلى وبين لونى
ومن بصة عنيكى السودا لعيونى
وتنهيدك وتنهيدى
ووقفة شعرى لحظة ايدك المرمر ..
..ما تلمس ف الهوا ايدى
وهزة شفتى يمك
وهزة شفتك يمى ولا همك
كلام الناس هيجرحنا ..هيدبحنا ..
.تقولى ان أنتى شريانى وأنا دمك
ومش بدرى ولا بتدرى
ورعشة جسمى لما يمروا كفينك على صدرى
ونتكلم كلام يمكن ما نفهمهوش
وكلمة تجر ميت حدوتة وحكاية
وأنا بين النجوم والورد تايه فيكى يا آية
ومحتار فى السنين بالطول
ودايخ فى الساعات بالعرض
وأقيم لك فى الصلا يمكن
تؤمينى ...تضمينى ...
تخلينى أحس ان الصلا (ف) حضنك عليا فرض
وبسأل نفسى معقوله تكونى زينا (م ) الأرض ؟
ولو كنتى
سمانا دى سما لينا ولكن فوق ضفيرتينك سما وبجد
تايه فيكى يا آية
سمانا دى عشان خاطرك سما مراية
وأنام حبة تهزينى
أفوق ماسك كتاب فى الشعر والتانى كتاب دينى
وقدامنا كتاب صاحبه ما هوش عارف
يفرق يعنى ايه عالمة وعلامة
ونقراه ننفجر (م )الضحك أحس انك
ما زلتى بتعشقى فيا حاجات يامه
تبصيلى ونتنهد ...ونتكى على ايدينا
تتوهى ف حضنى أتوه فيكى ونتدارى ف بعضينا

شعر / سعيد حامد شحاتة

[عيسى عدوي]

أخي سعيد ..أهلا وسهلا بك وإبداعك ...قصيدة جميلة ..ولذيذه ...تدل على شاعر متمكن ...ولكن كنت أتمنى عليك وأنت الشاعر الجميل ...أن تبتعد عن وصف الصلاة ..في حضنها بالفرض ...فلا شك أنك ستجد تشبيها أجمل ..لما كنت تفعل ...مع خالص التحية

[إياد حياتله]

ما شاء الله عليك أيها السعيد
قصيدة جميلة
وبوح مليء بالشجو والعشق

أحسنت
ومرحبا بك بيننا

[أشرف الشافعى]

الاخ الشاعر / سعيد شحاتة
السلام عليكم ورحمة الله وبركاته
سعدت بقراءة نصك .. وقد قراته من قبل ضمن قصائد ديوانك المعنون بنفس إسم هذا النص
وأعلم ايضا ان هذه النص .. نص قديم لك .. ومكتوب من سنوات عدة مضت
وانا أوافق تماما الاخ/ عيسى عدوى فى ملحوظته
النص جميل وتعامل مع اللغة بوعى وبرغم غنائيته العاليه إلا انه نجح فى الإمساك باذنى وانتباهى حتى النهاية .. وهذا أفسره بحالة الصدق الشديدة .. لكن مقطع الصلاه فى حضنها والفرض
اخرج النص من حالة الصدق إلى حالة المبالغة التى عفى عليها الزمن والتى افتقدت الصدق
هذا طبعا بخلاف الدخول فى منطقة شائكة انت فى غنىًً عنها وأنا لا احاكم النص اخلاقيا بقدر ما ازن هذا المقطع فنيا فلا اجده قد اعطى ماتريد توصيله بصدق
الاخ سعيد / ديوانك ضمن عدة دواوين مهمة تتصدر مكتبتى بمصر وهذل شرف لى
وانت شاعر جيد ومهم وقادم إن شاء الله واتمنى ان استمع لنصوصك الجديدة لنتواصل من خلالها
واليك إيميلى الخاص إن أردت تواصلا اكبر ... مع خالص امنياتى بدوام الإبداع الصادق أخوك / ASHRAF EL_SHAFF3Y

[email protected]
جدة

[سعيد حامد شحاتة]

أود أن أشكر هذه الردود الجميلة والمتميزة والتى لا تستطيع أن تخرج الا من مبدع يعرف معنى كلمة ابداع
أتمنى أن نتواصل سويا
مع خالص حبى وتقديرى واعتزازى بكم

سعيد

[وفاء أمين]

حاجات ياما
من شعرك تهز الروح وتجليها
جميله اّيه حبيتها
ومن وصفك أغانيها
ولا أعاتبك واعاتبك ليه ؟
ماأنا زيك أحب النور
وأجري عليه
علي راحتي وأوصف فيه
جميل قلمك
ورب الكون مافيه زيك
كلام صادق
اخدني لفوووووق
غرقت انا فيه!!

[سعيد حامد شحاتة]

المشاركة الأصلية كتبت بواسطة وفاء أمين

حاجات ياما

المشاركة الأصلية كتبت بواسطة وفاء أمين

من شعرك تهز الروح وتجليها
جميله اّيه حبيتها
ومن وصفك أغانيها
ولا أعاتبك واعاتبك ليه ؟
ماأنا زيك أحب النور
وأجري عليه
علي راحتي وأوصف فيه
جميل قلمك
ورب الكون مافيه زيك
كلام صادق
اخدني لفوووووق
غرقت انا فيه!!

************************

بين عيونى وبين عيونك
بحر أوسع من بحور السندباد
بين عيونى وبين عيونك
وردتين
وسفر مبعترنى على حدود البلاد
بين عيونى وبين عيونك
حلم بينبّت فى أحضان الولاد
بين عيونى وبين عيونك
خطوتين لكن بعاد