في الذكرى ال (59) للنكبة الفلسطينية

[نجيب صبري]

[poem=font="Simplified Arabic,5,,normal,normal" bkcolor="transparent" bkimage="" border="none,4," type=0 line=0 align=center use=ex num="0,black"]
في ذكرى النكبة (59)
يا ريتْ لَوْ بَقْدَرْ عَ لِمْحَبّي = وْحِبَّكْ...فِ عِبَّكَ كونْ مِتْخَبّي
تا ظَلْ أغْزِلْ يا حَبيبي فيكْ = أشْعارْ تَ يْقولو: الْمِتْنَبّي
وِنْ نِمِتْ غيري ما حَدا يْصَحّيكْ = بْهَمْساتْ تِطْلَعْ مَنْ وَجَعْ قَلْبي
وِنْ أشَّرِتْ بِعْيونَكِ بْلَبّيكْ = وْتِقْبِرْ عُيوني انْ كانْ مَ تْلَبّي
مَ بْحِبْ شي في هَالدِّني يِئْذيكْ = وْمَ بْحِبْ شوفَكْ حالْتَكْ صِعْبي
وْمَ بْحِبْ تِبْقى في عَذابي شْريكْ = وْمَ بْحِبْ تِشْرَبْ طاسْةِ الرَّعْبي
يا ذاتْ ذاتي...خاطْري يْناجيكْ = عُمْري مَرارُ عيشْتي صِعْبي
مَعْلَشْ...سامِحْني إذا بْجافيكْ = ما فيكْ مِثْلي تْعيشْ هَالنَّكْبِي
يا وَطَنْ يَ اللّي بِالْمُهَجْ نِفْديكْ = وْنِرْوي بْدِمانا غْصونَكِ الرِّطْبي
بِنْموتْ نِحْنا ...وْرَبّْنا يْخَلّيكْ = نِفْنى...وْإِنْتي يِحْرُسَكْ رَبّي
مِنْ هَالثَّماني وَرِبْعينِ الْ بيكْ = لِعْبَتِ الرّيحِ...سْمومْها غَرْبي
وْلَلْيومْ كُلْما نْحاوِلِ نْداويكْ = إِبْيِلْتَعَبْ فينا أَلِفْ لِعْبي
فِ سْهولَكِ,جْبالَكْ,عَلى رْوابيكْ = تاريخْ كُلُّهْ حْروفْ مِلْتِهْبي
تاريخْ مِثْلِ مْواجْ لَ طْلَنْتيكْ = مِثْلِ تْسُنامي...الفارِسِ الْحَرْبي
وْما بِخِلْ في الْموجي الْباسيفيكْ = وْما بِخْلَتِ الْهاجانا وِالْعُصْبي
موجي مَ نِعْرِفْ وينْ بِتْوَدّيكْ = وِبْتِقِلْبَكْ شي كَمْ أَلِفْ قَلْبي
مَرّا بِ حَبْلِ الْمِشْنَقَهْ تْدَلّيكْ = مَرَّهْ بْ رَصاصِ الْمَجْزَرَهْ الضَّرْبي
وْمَرّا فِ كَهْفِ الْمَقْبَرَا تِخْفيكْ = وْمَرَّهْ النَّفي عَنْ موتَكِ بْيِنْبي...
يا إِبِنْ إِمّي الْقُدسْ بِتْناديكْ = وْعَ شْفافْها كِلْماتْ مِنْتِحْبي
حيفا وْيافا...عَنْ صَفَدْ بَنْبيكْ = عَكّا الْ عَ كِتْفِ الْبَحَرْ مِنْتِصْبي
وِاللِّدْ وِالرَّمْلي...مُشِ الْمَكْسيكْ = وْلا هِنِّ في الْمِتْجَمِّدِ الْقُطْبي
فيهِنِ تْمَنّى جَدَّكِ يرَبّيكْ = ويعيشْ فيكِ الْعِزْ مِتْرَبّي
مُشْ إِذا بْتِعْطَشْ وَحْدَكِ بْيِسْقيكْ = بِسْقي مَعاك التّينِهْ وِالْعِنْبي
هاكِ الْمَرابي كُلْها مْرابيكْ = ضاعَتُ...مِنْها ما بِقي حَبّي
يا إِبِنْ إِمّي صيحْ فِ مْنافيكْ = يا ريحْةِ الْخِلاّنْ وِالصُّحْبي
إِلْفَرَحْ كُلّو طايِرُ ناسيكْ = وِالْحُزُنْ بَسِّ الْ طِلِعْ بِالسَّحْبي
يا وَطَنْ كيفِ نْصونَكُ نِحْميكْ = وْمِنْ فوقْ راسَكْ نارْ مِنْصَبّي
يا للأسَفْ بِفْرِقِشْ عَنْ ماضيكْ = حاضِرْ بِقولِ الدُّنيَه مِنْقِلْبي
بَعْرِفِشْ كيفِ الْ بِحْرُسَكْ بِدْميكْ = بالْخاصْري ,وِالْعينْ, وِاللُّبّي
وْبَعْرِفِشْ كيفِ الْ بِعْشَقَكْ بِرْميكْ = وِلاّ غَدا حُبِّ الْوَطَنْ كِذْبي
غُزْلانَكِ الْ بِرْعينْ في واديكْ = بِتْصيحْ :وينِ بْلادْنا الْخِصْبي
الْقُنْديلْ وِالْعُلّيقْ لِمْعَبّيكْ = ما خَلَّ فِ تْرابِ الْوَرِدْ رِبّي
صارِ الْوَطَنْ يا صاحِبِ التَّكْتيكْ = مِثْلِ الْفِجِلْ بِنْباعْ فِ الْحِسْبي
صارِ الْوَطَنْ يا سِيِّدي يا بيكْ = كُرْسي خَشَبْ...وِمْعَلِّقا رُتْبي
يا فَلَسْطيني باسْمكِ بْناديكْ = وِتْذَكَّر انُّهْ الْوَطَنْ مُشْ عِلْبي
بيجوز إِنّو واجْبي اوَعّيكْ = عُمْرِ الْوَطنْ ما كانْ لَ الْحِزْبي!!!
******[/poem]

[عيسى عدوي]

رائعة جديدة اخرى من روائعك اخي ابا هيثم ..أتمنى لك من الله دوام الصحة والعافية ...معذرة لتأخري في الرد ..حيث تعطل الحاسوب عندي في البيت ..مع خالص التحية

[إياد حياتله]

ما شاء الله عليك أخي نجيب
والله تستاهل هذه الرائعة أن تصدح بها أصوات الحداة

[نجيب صبري]

الشكر كل الشكر لك يا أخي إياد على هذا النفس الأدبي المتذوق .
ودمت بألف صحة وعافية

[رياض بن يوسف]

زجلية جميلة ، تحتضن باقتدار و فنية واضحين جرح فلسطين الحبيبة ، وقد يسر الشاعر بجهد مشكور قراءتها من خلال ضبطها بالشكل.
تحياتي للمبدع نجيب