بعد أن تزوجتْ سندريللا - مسرحية

[أحمـد محيي الدين]

المشهد الثالث

يفتح الستار على نفس ديكور المشهد الأول ، يدخل الأمير من باب الشقة ويغلق الباب، يسمع له صوت.

صوت سندريللا / ( من داخل المطبخ ) انت جيت ؟
الأمير / ( زاعقاً ) أيوة .. ( يجلس على طاولة ثم ينادي ) خلصتي الغدا ؟
صوت سندريللا / لسة شوية .
الأمير / ( بتذمر) يارتني كلت عند أمي .
سندريللا / ( تدخل الصالة في يدها كبشة) هي امك دي بتعرف تطبخ ؟
الأمير / بلاش تلاقيح الكلام ده يا ولية .
سندريللا / ولية ف عينك قليل الأدب.
الأمير / ربنا ع الظالم .
سندريللا / ربنا ياخدك .
( تعود سندريللا للمطبخ ، ثم ترجع الصالة حاملة حلة وبعض أرغفة تضعهم على الطاولة.. يكشف الأمير عن الغطاء )
الأمير / إيه ده ؟ ملوخية برضه ؟؟
سندريللا / ( ساخرة ) وعيش كمان اهو .
الأمير / ( بنفاد صبر) احنا مش لسة واكلين ملوخية وعيش امبارح ؟
سندريللا / إن كان عاجبك .. ومافيش عشا النهاردة كمان . ( تستطرد)
... عملت ايه في الشغل ؟
الأمير / ( يبدأ في الأكل ) ماعملتش .
سندريللا / وأصرفها منين دي بقى ان شاء الله ؟ هتفضل قاعدلي ف البيت كدهو ؟
الأمير / ( غير مبالٍ) أعمل ايه يعني ؟ ماهو مافيش حد راضي يشغلني، وكل ما أروح لواحد يقوم عايز يضربني.. يعني معلم القهوة مثلاً عشان قولتله أشتغل أي حاجة عندك ؛ ( مقلداً ) مسكني بدراعه الطويييييل وقعد يرجّني ، وقعد يقولي هو انت بوليس ؟ .. وراح راميني بعيد .
سندريللا / وسكت له ؟
الأمير / لأ طبعاً .. ده أنا طلعت أجري .
سندريللا / ( بتهكم ) جدع.. يخليك لأمك .
الأمير / إيه ؟ مش مصدقاني ؟
سندريللا / ( بسخرية) لا مصدقاك.. مش انضربت ؟
الأمير ( مكملاً ) ولا صاحب الفرن ، أقوله ماعندكش شغل ؟ قعد يضحك.. يضحك.. يضحك..
سندريللا / ( مقاطعة) تلاقيه كان بيضحك عليك ، ماهو ليه حق .. وانت شبه سندوتش الفول كدة .
الأمير / وقال لي ( مقلداً ) تشتغل ايه ؟ تهرش ف ضهري ؟ ولاّ تهوي للعيش ؟ ( متابعاً) وقام شاخط فيا، وراح منادي على صبيانه وقالهم ( مقلداً) وضّبوه.. ( متابعاً ) وأنا اجري، وهم ورايا.. أجري.. وهم ورايا..
قطعوا نفـَسي .
( يُسمع صوت من الخارج .. يابا .. يابا ، ثم يدخل المسرح باندفاع طفل صغير في سن الخامسة، ينهض البطلان لاستقبال الطفل )
الطفل / ( مكملاً ) يابا .. يابا .
الأمير / فيه ايه ؟
الطفل / الواد مروان بن شلبية ، كان عايز يضربني .
سندريللا / هو انت على طول مشاكل مشاكل .
الطفل / أعمل له ايه يعني ؟ مش عايزه يلعب معانا، ده بيضرب العيال كلها.
الأمير / طب ما تضربه زي ما بيضربكم .
سندريللا / ( بتهكم ) بلا وكسة.. هو الكبير كان ضرب، لما الصغير هيضرب ؟
الطفل / ( متسائلاً بجدية ) هو انت كمان مروان بيضربك يا بابا ؟
الأمير / بس يا ولة .
سندريللا / انت هتتشطر ع الواد الصغير ده ؟ ( توجه كلامها للطفل) روح يا واد يا شعبان العب هناك.
( ينزوي الطفل بجانب من المسرح يلعب بألعاب ، ويجلس الأمير على كرسي وكذا سندريللا ) .
الأمير/ يا ترى الواد الصغير ده هيطلع أمير ولا شوارعي !!
سندريللا / تسلم يا ذوق يا ابن الأُمرا .
الأمير / فكري معايا بدل التقطيم اللي مالوش لازمة ده ، الواد ده مصيره هيبقى ايه ؟
سندريللا / ( بتفاخر) الواد ابن أمه ، يعني هيطلع واد دماغ .
الأمير / ( يفقد الأمل ) عليه العوض .. كان نفسي الواد ده ينفع البلد والناس ، وينفع نفسه .
سندريللا / هينفع ماتقلقش ، وبطّل طريقتك دي في الكلام معايا .
الأمير / كان نفسي يبقى أمير محترم .
سندريللا / ( ساخرة) زي أبوه كدة ؟
الأمير / بطلي طريقتك دي في الكلام معايا .
سندريللا / ( منادية على ابنها) خد يا واد يا شعبان .
الأمير / ( بتفكر ) متهيألي عندِك حق ، مافيش أمير اسمه شعبان .
سندريللا / مالـه شعبان بقىىىى ؟
الأمير / ( يقهقه بسخرية ) سندريللا شعبان .. ( يستمر في القهقهة )
سندريللا / ( بغيظ ) ايه اللي بيضحكك بقى ؟
( يستمر الأمير في القهقة بصوت أعلى )

" إظلام "

**