غني براحتك

[إكرامي قورة]

غني براحتك

مهداة لصديقي صاحب الاسم المستعار


غني براحتك
والبس ألف جوانتي ف راحتك
عارف هزة إيدك لما بتكتب شعر
حافظ شكل حروفك صم
من أولها ... شميت ريحتك
غني براحتك

يا ما نصحتك
إوعاك تلبس يوم غير وشك
أصل صراحتك تفضح غشك
وانا والله باحب صراحتك
راجع ليه متخفي خلف قناع
مصنوع من نحتك ؟!
أيوه أنا حاسس إنه صحيح من نحتك
وعشان تشعر إني بأحلى كلام ريحتك
قول لقناعك
إن الواد " كرملله" فراسته
عرفت مين الكائن تحتك

إوعى تظن بإني يا صاحبي دبحتك
قلبي عليك وانا ياما نصحتك
إوعى تخون ف كتابتك نفسك
حب تكون ف كتابتك نفسك
وارفض إن الرئة دي تطلّع يوم غير نفَسك
وعشان حق صداقة الشعر عليا
حيث دماغي نازل دايماً ضيف على ساحتك
ليلة إمبارح
وانت يا دوب بتحط قناعك
من غير قصد يا صاحْبي لمحتك

[عيسى عدوي]

رائع يا أبا كريم ...ربنا يسمع منك ويهدي صاحبك ...

[كفا الخضر]

جميلة يا ابا كريم
مثلك لا يغير لون ابداعه الفصحى او العاميه
مبدع انت على كل حال
تحياتي

[د. حورية البدري]

آه م " التُقْيَه "
أو مِنْ خوف يِبْعِدْ أصحابنا
عَن أحلام الشوف والرؤيه
لَمَّا يداري الواحِدْ مِنهُم أصل ملامحُه
تِصْبَحْ غير واضحه ومَطموسَه
والأشعار
ان قالها
ح تصْبَح
زَي ملامحُه
مِشْ مَحسوسَه
لابسَه قناع زايف يِمْسَخها
تِصبَح ماسخه
وان حَتّى يسَمِّيها بَسْبوسَه ! 00

**
دُمت أخي الفاضل د. إكرامي بخير وإبداع جميل ومعان نبيلة كعادة كلماتك

دُمت بكل خير

تحياتي

[هشام الشربيني]

والله انت هايل يا إكرامي
فتحت نفسي يا حبيب للعامية اللي يادوب بعرف اتكلم بيها ..
نعمتَ بالصحة دائما يا چوكر الأدب