قصة اوكرانيا باختصاااار ..

[راحيل الأيسر]

أوكرانيا كانت متجوزة في روسيا، وقاعدة وكافيه خيرها شرها، لكن لما روسيا ضعفت وبقت المصاريف مش قد كده، قررت أوكرانيا إنها تعمل خُلع!

بتوع الحركة النسوية اللي في أمريكا وقفوا جنبها، وبتوع حقوق الإنسان اللي فى أوروبا وقفوا خلفها، وكلهم قالوا لأوكرانيا: لقد مضي عهد الذكورية الروسية، ومرحبا بعهد التحرر من الأغلال!

بس علشان العالم الحر يعيش آمن ومستقر لازم يا أوكرانيا ناخد منك أسلحتك النووية وصواريخك بعيدة المدى، يعني تقصي شعرك وتلبسي شورت وتنسي أصلك وفصلك، انتى اليوم بقيتي متحررة وغنية وفي جنبك النسوية وفي ظهرك المنظمات الحقوقية!

وكمان هنضمك للحلف بتاعنا، ومفيش راجل يقدر يهوّب ناحيتك تاني، ولو الروس فكروا بس يقربوا منك هتشوفي احنا هنعمل إيه؟!

الروسي الذكوري كان الفترة اللي فاتت كلها موجوع ومخنوق من الحركات اللي اتعملت فيه، وخصوصاً من الهانم اللي سابته ونسيت العيش والملح والفودكا!
ونوى إن لازم يرجع أوكرانيا مرة تانية في عصمته، واللي يحصل يحصل، وطلع بعبارته الشهيرة: جواز أمريكا من أوكرانيا باطل!
والراجل يطلعلي بره، والرجالة كلها بتناديه بضبط النفس!!
وهو دلوقتي بيحاصر أوكرانيا، وبيطلبها في بيت الطاعة!
وبيقول للعالم كله: الخلع بتاع اوكرانيا مني، باطل باطل باطل!

طيب الحركة النسوية الأمريكية فين؟!
طيب حقوق الإنسان الأوروبية فين؟!

كلهم بيزمجروا وبيزعقوا وبيقولوا بكل وضوح، احنا مش بنتدخل بين الراجل وطليقته،
احنا هنعاقب الراجل المفترى وهنرفع عليه قضايا وهنحرمه يشوف فلوسه وتجارته في بلاد برّه، أما ان احنا ندخل معاه في خناقات مباشرة، فلا وألف لا، وعلى أوكرانيا أن تواجه الذكورية الروسية بمفردها، ونحن جميعاً مراقبون للأوضاع عن كثب!!
نعم عن كثب!!

الست أوكرانيا بقت لوحدها وبتقول لنفسها:
طيب فين الوعود بجنة النسوية؟!
فين الوعود بإنكم في ظهري وجنبي وعلى يميني وشمالي؟!
كلها وعود للاستهلاك المحلي، وعلى المتضرر انتظار القضاء!!

وما زالت مشاكل الأسرة تهز العالم هزاً وفي انتظار آخر الأخبار!!












كتبه: محمد سعد الأزهري