أنت فين يا مرسى مصر بتدور عليك

[عبد الحميد بدوى]

أنت فين يا مرسى ؟؟؟

أنت فين يا مرسى
مصر بتدور عليك
أوعى تكون مستخبى
تحت كنبة ولا كرسى
أظهر وبان عليك الامان
قول كلمتك أو أصدر بيان
فين قوتك فين نهضتك
فين وعودك
ولا دا كله كان زمان
ببعتلك سلامى
والف تحية للاخوان
أنت رئيس منتخب
الحق نفسك قرب من شعبك
اللى أختارك واللى أنتخبك
واللى ما أنتخبكش كمان
تقدر تخلى جيوش
من الغلابة تتلف حواليك
وهى اللى تدافع عنك
وبروحها تفديك
الشعب كله كان بيقول
الله يقويك
ودلوقتى مش عايز أقولك
بيقول أية
ما أنت سامع وشايف بعينك
أظهر وبان الله يخليك
البلد بتضيع من أيدينا
ومن أيديك
مش عايزين حد يقول
فين أيام مبارك
الله يبارك فيك
ما تضحكش الناس علينا
لو كنا ظالمين مبارك
يبقى ظلمنا نفسنا بيك
انت فين يا مرسى
مصر بتدور عليك

الشاعر
عبد الحميد بدوى