مين يشترى الورد منى ؟!!!

[ربيع عبد الرحمن]

[align=center]مين يشترى الورد منى ؟!!

مين يشترى الورد منى
جبر الخواطر فرض
دا أنا منكم ..
وأنتوا ياناس منى
قرب .. وخد لك وردة
بطل الخوفان
ادهسه برجليك
قرب هنا منى
الخوف جبان
اشحن فؤادك بالعمار
اعلى عليه و اكبر
وشيل رقبتك فوق
شيلها لحد السحاب
ومد ايدك هات
ضى الشموس من كبد أوجاعنا
لو حتى يوجعنا

مين يشترى الورد منى ؟!!
ياست ياللى هناك
شايلة الحداد والزاد
على كفك
على كتفك
ووراك تل أولاد
مشنوقة فيك النظرة
مرشوقة جو الجحر
بين الضلع والشريان
وريد بينزف
والدم شارب قهرتك
بيشفك
نصل الكفيل بيحز
فى الرقبة
كلب الحراسة..دوار سواقى
خدى منى وردة
روح الشهيد طبطبت على سدرى
من عز نومى صحيت
مادريت
إن كنت لسه شريد
بين عرقى وبين دمى
ولا بريت .. مقصوف جناحى
ورمحت جو البيت

رفعت سيفى الحلم اللى خدته نشان
فى الخروج الأخير
وقعت كل الفوارس
انحط سدرى
وادريت فى لحافى
شديت نفس
مادريت
إلا بشىء دافى
أتارينى
قطعت شرايينى و اكتافى

يادى النهار
يابو الحليب حامض
شد الحزام ع البطن
كان عزة
ولا كان الفخ ؟!
لا تقولى وزة
ولا تفاحك ياغزة
ولا البرقوق العريشى
و لا كنت عمرى
دقت فى يوم مزة
شد الحزام ..
بتسأل زى ريح غربت
كان الدوا
ولا لعبور الرخ ؟
والدخول إياه ؟
يانخل لا تنحنى
لا تطاطى
مشدود شعاعك
يم السحاب اللى اندلق
اتهز ..
ولاطاق عيون شدتك
إدارى فى باطى
فجأة كأنى
انتشيت
لويت الجذع و الرقبة
طاطيت ..لحد النهاردة

مين يشترى الورد منى
أنت ياعمى
ياللى ماشى هناك
معايا ورد أحمر
بإيدى عتقته
فى ذات نهار أبيض
مكتوب عليه اسمك
دم الشهيد نشع
فى جلدى الرقيق
فضل يدور عن طريق
يلضم خيوطه بوريدى
لجلن أشيل دمه
عملت نايم
أتارينى .. ياللسخرية
ميت ..
من زمن .. ولا دارى!!!

ياعم وقف .. وكلمنى
يعنى أسيبه يروح !
الورد روحه معلقة باسمك
شمُّه تلاقيه دمك
لو كان يهمك
أشتريه عنك !!
وبإيدى أخنق ذلتى
وخوفى
:" أنت ضمير نصاب..
تميمة ع الابواب
جيفة ..
ومالها حساب
تحت الحجر .. خايف
ياعم ماتصدقشى
تحت الحجر جرح
جنسيته مصرى
بينز من بدرى
لا مغولى
ولا تترى
ولا جنس واطى يهودى
ما أنت بيهم دارى
تحت الحجر .. خايف
ما أنت بيهم
وداريهم
وأنت اللى ياما
عرفت مخازيهم
مخابيهم
وشمت على زندى
تعاديهم


ياعم ليه ساكت
وليه رميت فاسك
مستنى لسه الأرنب الأسطورة
يحط بين رجليك
ياعم فوق
الأرانب .. بص فى الصورة
لبست تياب الأسود
عشان ماشفته معدى بين رجليك
ولجل ايه تحرت
ولجل ايه تتعب
قعدت تستنه
غفلان
وهمه فى العتمة
بيجهزوا خرجتك
من كل جنس ولون
لأمة مقهورة
كرشان .. ياذل العاصمة
مدلدل ..
مابين قدم سيدنا
متجندل
وسيدنا
ورد متعلق
فى كل فترينا
لما لجدار بيتنا

شفتوش ياعم غيطانى
شفتوش ياعم كشيك
ياحلمى .. ياشحاته
ياولد سليم
ريحة اليهود زاعقة فى النوار
ومن الورق طالعة

يايوسف
ياعم الكل
شفتوش فى قصر العزيز
شايل كنوز الوطن
بيمزع الفستان
ويعرى بطن الأميرة
ويقدمه قربان
لسياده عبر الحدود
كان عبقرى الأزمة
وركبنا بالجزمة
حتى اللى صان قلمه
وقال .. لأه
انقصف م القهر
ونساه ..الفولى والسقا
شفتوش فى وش عشماوى
ياولد خميس
شفتوش ياحلم الكلمة والموال
شفتوش ياعم سرور


ياغمة يامكفية
ع الولاد ضلك
اللقمة بتعلك
والهدمة بتذلك
سراميك جنينتك
بتحركك
وتذلك
حسبى دى ردغة وحل
مش نهرك
حسبى السكوت قهرك

مين يشترى الورد منى ؟!!
دا الورد ريح القدر
الراية والمبدأ
مين يشترى الورد منى ؟
قبلن مانوح يغرق [/align]

[وفاء أمين]

[img3]1234567[/img3]يايوسف
ياعم الكل
شفتوش فى قصر العزيز
شايل كنوز الوطن
بيمزع الفستان
ويعرى بطن الأميرة
ويقدمه قربان
لسياده عبر الحدود
كان عبقرى الأزمة
وركبنا بالجزمة
حتى اللى صان قلمه
وقال .. لأه
انقصف م القهر
ونساه ..الفولى والسقا
شفتوش فى وش عشماوى
ياولد خميس
شفتوش ياحلم الكلمة والموال
شفتوش ياعم سرور
الأستاذ /ربيع
مقاطع مؤثره حيه تشرح الكائن وتستشف الأبعد
إبداع جميل
سلمت يداك
مودتي

[شريف سيد صلاح]

قبلن مانوح يغرق


الغرق فى جماليات كلماتك متعة لا حدود لها
أشكر على عاميتك الرائـــــعة

[عبدالحليم مدكور]

أتمنى من كل أخواني في قسم الزجل والشعر العامي
قرآة هذا النص الرائع وإعطائه جزء من وقتهم للتفكر
كما أتمنى : تثبيته ولو لمدة ثلاثة أيام ؛ تقديراً لجماله وروعته .

[سلمى رشيد]

أخي الشاعر ربيع
العنوان قال لنا إن أغنية جميلة ورقيقة ستكون هنا عن الورد والبياض وصوت عبد الوهاب
ودخلت لأجد كلمات غاية في الشفافية تحدثت عن الوجع والقهر وأناس نصاحبهم في كل صباح في رحلة بحثهم عن ستر كرامتهم.
أشتري الورد بكل ألوانه للأوطان وأقول لها لأجلك ترخص روحي .
سلمت ال روح التي كتبت .
كل التقدير