الأمل فى الشعب

[محمود جمعة]

الأمل فى الشعب

الأمل ف الشعب مهما العمر طال
الأمل فى الشعب صناع القرار
الأمل فى دراعك أنت و ف النضال
إياك تصدق غير أمانى الانتصار

اوعى لا ضعفك يهزمك و تبات غريق
إياك لخوفك يحدفك بره الطريق
محني جبين الخوف و ملهوش من صديق
و انت الأمل فى النصر و طلوع النهار

إن هنت هان دمع الأرامل و الشهيد
نصبح عبيد من بعد عز ما هوش بعيد
و انت اللى قادر تحيى مجدك من جديد
إن قمت قام الكل فوق الذل ثار

أنت الأمل يا شعب دايما و الصباح
مكتوب عليك الحرب مكتوب الكفاح
مين راح يجيب النصر و يعيد اللى راح
غير وقفتك ضد العدا نسل التتار

علّيِ صوتك و ف سكاتك دق كعبك
العمر واحد أخرته راح تلقى ربك
شاهد شهيد مجروح سعيد ولا حد أدك
أنت اللى قادر تحمى أرض و تحمى جار

ما تقولش كنا و كان قول هانتصر
و ارفع هاماتك للسما .. لا تنكسر
صبرك يطول و القهر غول مهما كبر
تصمد وتخلق م الرماد جمر وشرار

ارفع هاماتك للسما و اصرخ أنا
ابن الشهيد و ابو الشهيد مين قدنا
قامت أمم ماتت أمم و احنا هنا
نغزل فى توب النصر و نفك الحصار