مزاد

[سعيد حامد شحاتة]

قرّب قرّب
وتعال وجرّب
أول بيع بني آدم في العصر الحالي
الباب مفتوح
والصوت مبحوح
ووطن مدبوح ياللي ف بالي
مين عايز ييجي يقف ويبيع
ويدوق اللحمة العجّالي؟
الواقفة بلاش
والفرجة بلاش
بس اضحك واضحك بالعالي
قرب قرب
سقّف جامد
(صدام) في القفص اللي قبالي
وشوالي الخضرة ف كل مكان
افراح مزروعة ف ريح أحزان
ووجع انسان وغناوي شيطان
ريح بعض ف كراتين ومخالي
والبيع في جنينة البيت لبيض
تحت رايات الوطن الغالي
وعلالي الكلمة علي الأسماع
ويا كل بتاعة وكل بتاع
صدام للبيع قولوا إن شا الله
قرب قرب
سقف يا الله
افرحي يامائير
واضحك ياكوهين
وتعال وبص ياعبدالله
ألدونا ودوه علي ألدونا
بنبيع صدام
بصينية قديمة
قزازة قديمة
نحاسة قديمة
وعلبة كبريت وصابونة
ألدونا ودوه علي ألدونا
وعليه كرفتة وببيونة
ويا مزاد يا مزاد
زغرتوا يا بنات
سقفوا يا ولاد
دي الكلمة الطالة ماهيش ردة
صدام للبيع
بدراع مفتول
وودان تتحدي ودان الغول
وسنان بتقرقش أجدع فول
ودماغ دخلة برومة وصدّي
قرب قرب
لمزاد العطا فيه برطوشتين
وريال فضّة
وتعال وعاين عرضه وطوله
علي الفرازة وباللندة
ولا شغل دجل ولا ألابندا
صدام بشناب
وضروس ونياب
وضوافر زي أسود الغاب
وكتاب مفتوح للي محوّد
مين فاصل؟
مين قال هيزود؟
بريال من غير البرطوشتين
ستاشر ساغ
ولا جاني لا تأشيرة ولا بلاغ
والحنش اللدّاغ متقيد
تعا قرب خد واحد سيد
واكسب سخان
واسمع تعليق سيدنا السلطان
صدام خاين
والخاين في الدستور يتباع بالألومونيا
وأهو دا الدستور المطبق
علي شعبي وعلي ناس سكسونيا
صدامهم خان
والفجر أن حاول مرة يبان
في بلاده اطفوه
وإن واحد مد دماغه هاتوه
نعرضه للبيع ريح من صدام
وتعدوا العام وتجيبوا العام
وان عام علي وش الميه غلام
اغرزوا في دماغه سناني العاج
أنا اصلي خليفة الله في الكون
وامرني اني احكم بالكرباج
لاتاخدكم رأفة بطفل وشيخ
ولا منبوذة
ولا ست كبيرة ولا عجوزة
ولا حد يحاول يعمل بوذا ولا الحلاج
أنا أصلي خليفة الله في الكون
وأمرني اني احكم بالكرباج
في معيز ونعاج
عمالة بترمح في الملكوت
والأسد المتعافي الصدام
واقف قدامي كما الكتكوت.
ألدونا ودوه علي ألدونا
وخدونا عبيد في بيوت أبونا
وحراس للبير
والوجع الساكن جوا وريد الكلمة
قاسوه بالمتر وبالأمبير
ولا حدش مد دماغه وقام
ولا حدش أعلن أول كلمة لموته وصام
ولا حدش عام للبر التاني
يشوف صدام معروض للناس
ولا لابس سلطانه يغطيه
ولا ملكه مداس
والايد الفاس
عمالة بتكتب بالاخلاص
علي باب القفص المتعري
صدام للبيع!!!!!
وربيع الأمة جليد
ولسان الحق
حصان متلجم بالنبوت
وكلاب بتعيش
وأسود بتموت
وتابوت الصبر
بيحضن كل بدن رماح
والأسد ان مات علي ايد خاين
ف دا كلب وراح
وصباح غامق علي أرض براح مليانة نعاج
الحكم الأعظم قال صدام
وهدوّر علي قبر 'الحجاج'

http://saidshehata.blogspot.com

[إياد حياتله]

لن يطول هذا الوضع كثيرا أخي سعيد

حياكم الله

[سعيد حامد شحاتة]

المشاركة الأصلية كتبت بواسطة إياد حياتله

لن يطول هذا الوضع كثيرا أخي سعيد

حياكم الله

************
أشكر مروركم الطيب صديقى العزيز
وأتمنى أن تكون فلسطين بألف خير يارب
http://saidshehata.blogspot.com