نِفْسَكْ انَّكْ مَرَّه تِفْرَحْ
نِفْسَكْ انَّكْ مَرَّه تِفْرَحْ
يا فلسطيني اللّي بَخْتَكْ --------- بَخِتْ مِسْكينِه وْحَزينِه
كُلْ مَ بْتيجي تَ تِفْرَحْ ---------- ما بْتِلْقى إلها مُطْرَحْ
يا فلسطيني اللّي خَدَّكْ عَ اللّطيمِ تْعَوَّد
ومن يوم ما خِلْقَتْ عُيونَكْ غيرْ موتَكْ ما بْتِلْمَحْ
كاسِةِ هْمومَكْ مَلانِه -------- وْدَرْبَكِ طْويلِه وْمَريرِه
وْرِحِلْتَكْ مِنْ هانْ حَتّى اللّا نِهايِه – دَمْ يِنْزِفْ – دَمْ يِرْشَحْ
يا زَماني شو بِقي عِنْدَكْ مآسي
شو بِقي هْمومُ وتَعاسِه هاتْها ----- مَ العُمُرْ رَوَّحْ
نِفْسَكِ انَّكْ مَرَّه تِفْرَحْ
يا فِلِسطيني الْ عَ ظَهْرَكْ
شايِلِ بْلادَكْ وِماشي
وْخيمتَكْ طارَتْ مَعِ الرّيحِ اللّي تِسْفَحْ
وين ماشي وْلا مَدايِنْ لا قرايا بْوابْها للهَمْ تِفْتَحْ
الله يرحم يوم ما سيفِ العُروبِه كانْ يُقْطُرْ دَمْ
مِنْ راسِ اللّي راسو راسْ شامِخْ ما تْزَحْزَحْ
يِرْحَمَ الله ! الفاتْحَه ! عا روح أمِّتْنا اللّي صارَتْ مِثِلْ جيفِه
وْحولْها لِكْلابْ تِنْبَحْ
وين ماشي وْلا قْريبُ ولا بْعيد بيِفْرَحو في يومْ تِفْرَحْ
موتْ أحْمَرْ بِانْتِظارَكْ
فوق مِنَّكْ ، تِحِتْ مِنَّكْ ، عَنْ يَمينَكْ ، عَنْ يَسارَكْ
وين قاصِدْ يا فِلِسْطيني اللّي مِتْغَيِّرْ مَسارَكْ !
روحْ وَدِّعْ أهِلْ دارَكْ -------- عَجِّلُ وبَوِّسِ صْغارَكْ
كَمْ مَرَّه اطْلِعِتْ بَرَّه وِرْجِعِتْ مَ لْقيتْ دارَكْ
صِحِتْ يَ هْلَ الله يَ عالَمْ يا خَلِقْ ناديتْ جارَكْ
آه يَ جاري ... وينْ داري ...
صاحْ جارَكْ
يا مْعَثَّرْ مَنِتْ داري ... إنْهُمِ وْحوشِ الحَضارَه والبَراري
لَغَموها وْ فَجَّروها
وْهايْ شَحْفِه مِنِ بْلُكَّه مِنْ جِدارَكْ
ما بِقي إلا الصَّرارِ يذَكْرَكْ بِحْجارْ دارَكْ
بَسْ ما بِالكونْ قُوِّه بْتِسْرِقو مُفْتاحْ دارَكْ
بَسْ إصْبِرْ يا مْجاهِدْ يا مْرابِطْ ظَلْ صامِدْ
ما حَدا بِالكونْ بِقْدَرْ إنّو يِمْنَعْ
عَنَّكِ الشَّمْسِ اللّي بِتْبَشِّرْ بِموتِ الليلْ وِبْصَحْوِةْ نَهارَكْ
لا تْساوِمْ –لا تْسالِمْ – ظَلْ قاوِمْ !
إنْتِ وَحْدَكْ خُذْ قَرارَكْ
لَ مْريكا وَلا اسْرائيل ولا عَرَبْ تالي زَمانِ اتْحُطْهُمْ جُوّاتْ عِبَّكْ
شيلْ وِ ارْمِ مِنَ افْكارَكْ
وِحْرِقِ العالَمْ بِنارَكْ !
ما حدا بِالكونْ بِقْدَرْ يِسْرِقَكْ فَرْحِةِ اسْتِشْهادَكْ ..... واعلانِ انتصارَكْ !
***
وين قاصِدْ يا فلسطيني اللّي دَرْبَكْ كُلّها
دَمُّ وجنازاتُ ومقابِرْ
كيفْ عايِشْ – الله يِعْلَمْ كيفْ عايِشْ –
يا جَبَلْ عالي مَ هَمَّو القَصِفْ مِنْ كُلِّ المحاوِرْ
ظَلْ صابِرْ – والقَصِفْ شَغالْ مِنْ بَرُّ وبَحَرْ مِنْ جَوّ
كِنّو الجو فوقَكْ بِالقَذايِفْ صارْ ماطِرْ
ظَلْ صابِرْ – النَّصِرْ عَ البابْ ناطِرْ
ما إلَكْ إلا إلهَكْ
قادِرِ يخَلِّي صُمودَكْ يِقْهَرِ الصّاروخْ وِالدَّبابِه وِجْيوشُ وعَساكِرْ !
يا إلهي قُدْرِتَكْ فوقِ اليَهود وفوقْ أمريكا
وْزَعامِه مِنْ عَرَبْنا راسْها ....
احْرِقِ العالَمْ بِنارَكْ يا فَلَسْطيني وْبِغيرَ الله إوعى لا تتاجِرْ
ظَلْ صابِرْ مَنِتْ خايِفْ- لا هْجومُ ولا قَذايِفْ –
صارْ لِـعْمى إلَكْ شايِفْ
صارْ لِـطْرَشْ إلَكْ سامِعْ
صارْ لِـخْرَسْ فيكْ يُنْطُقْ
وِغَنّي شِعِرْ في لَحِنْ شاعِرْ !!
وِالحَجَرْ عِرْفَكْ بِإنَّكْ قَبِلْ تولَدْ إبِنْ ثائِرْ
ظًَلْ ثائِرْ – وِنْتَفِضْ –
وِالْعَنْ أبو اللّي جايْ يِسْرِقْ وَلَو ذَرَّهْ
مِنْ تُرابِ بْلاْنا الْ أغْلى
مِنِ كْنوزِ الخَزايِنْ وِالجَواهِرْ
28-01-2008, 04:33 PM
نِفْسَكْ انَّكْ مَرَّه تِفْرَحْ
العرض العادي
