( مرعوب م الشيب اللى ف حزنك ) قصيدة لاشرف الشافعى

[أشرف الشافعى]

مرعوب م الشيب اللى ف حزنك

أهى دى اللحظة
اللى انا ما اتمنيتش اعيشها
صوتك عجز يامحمد
مع إنى يادوبك سايبك من كام يوم
صوتك حسسنى
إنى لاول مرة ف غربة
باينى ظلمتك ياابنى
قال إيه ...
كنت باقول برًّاوى
ومش فارقة معاك
كنت اخرج وارجع
ألاقيك مش حاسس بيا
وانده : إزيك
... ماتردش
أنده تانى وعاشر
وانت ف عالم تانى
وأتجنن واشتم
( وانا جوايا باموت م الضحك عليك)
واعمل إن انا زعلان ومخاصمك
تتلخبط من خجلك
والاقيك جرى تخش ورايا
تحضن بشفايفك ضهر إيديا
وتقوللى بحبك
والله ظلمتك ياابنى
اتاريك كنت بتطمن بيا
واتارينى ما كنتش فاهم
إن انت مونس روحك بشتيمتى وزعلى
لما سمعتك ف التليفون بتقوللى
واحشنى يابابا
ما قدرتش امسك نفسى
أول مرة اعيط ف الغربة
ياااه ...
مع إنى كنت باحس بفرحة زمان
أول م اسمعها
أكبرمن فرحة عيل بعد صلاة العيد
وافضل اعد ف طلباتك
واقولك حاضر مش ح انسى
( الشيبسى –
وعصير المانجة
– وكروت اليوجى )
بس المره دى الكلمة غويطة
قد المسافات اللى مابين كفينى وبوستك
وحزينة ...
زى دموعى اللى حايشها
من يوم ماسافرت وسبتك
عايزك يامحمد تسامحنى
أصل أنا مرعوب لما ارجع ...
والمح أحاسيسك واقفة بتتسند
على عكاز الغيبة
ما اقدرشى أقولك ( ياابنى )
خايف م الشيب اللى ف حزنك
يكبر على كلمة بابا
صوتك عجز قوى يامحمد
صوتك عجز قوى....
ياآبا

.

ASHRAF EL_SHAFF3Y

جــــــدة
19 /2/2007

[سعيد حامد شحاتة]

قصيدة جميلة ومتميزة وأعتقد أنها انطلاقة جديدة فى عالم العامية المصرية
عايزك يامحمد تسامحنى
أصل أنا مرعوب لما ارجع ...
والمح أحاسيسك واقفة بتتسند
على عكاز الغيبة
ما اقدرشى أقولك ( ياابنى )
خايف م الشيب اللى ف حزنك
يكبر على كلمة بابا
صوتك عجز قوى يامحمد
صوتك عجز قوى....
ياآبا
_________
ايه كمية الحنين والحب والاشتياق والخوف دى
ازاى قدرت يا أخ أشرف انك تجمع التعبيرات الجميلة دى كلها فى الحيز الصغير ده
بجد القصيدة أبكتنى
و أتمنى أن يحدث ما تريد
تحياتى
أخوك المحب دائما
سعيد

[أشرف الشافعى]

المشاركة الأصلية كتبت بواسطة سعيد حامد شحاتة

قصيدة جميلة ومتميزة وأعتقد أنها انطلاقة جديدة فى عالم العامية المصرية
عايزك يامحمد تسامحنى
أصل أنا مرعوب لما ارجع ...
والمح أحاسيسك واقفة بتتسند
على عكاز الغيبة
ما اقدرشى أقولك ( ياابنى )
خايف م الشيب اللى ف حزنك
يكبر على كلمة بابا
صوتك عجز قوى يامحمد
صوتك عجز قوى....
ياآبا
_________
ايه كمية الحنين والحب والاشتياق والخوف دى
ازاى قدرت يا أخ أشرف انك تجمع التعبيرات الجميلة دى كلها فى الحيز الصغير ده
بجد القصيدة أبكتنى
و أتمنى أن يحدث ما تريد
تحياتى
أخوك المحب دائما
سعيد

الاخ سعيد ...
سعيد انا أيضا برأيك ومرورك وأتمنى ان أظل عند حسن ظن ذائقتك الواعية
اخوك / اشرف

[إياد حياتله]

مع إطلالاتك القليلة هنا أخي أشرف
إلا أنّك لا تمرّ عابرا
بل في كل مرّة تتحفنا بما هو رقيق وبهي
وهذه والله من أجمل ما قرأت لك
وأثني على قول أخينا سعيد ورأيه بالقصيدة وبشاعريتك

وسأثبتها لرّقتها وحميميتها ولأنها والله تستاهل
حيّاك الله أخي أشرف

[وفاء أمين]

أوجاع الغربه يتعامد قلمك عليها فيوجعنا أستاذ أشرف و الأمل هو المرسي
لنا سواء كنا مفارقين أو مفارقون وهذا من طبع الحياه وحكم الأقدار علينا
والنص جميل ومعبر وايضا تلقائي
وربنا يجمعك بأحبابك ويجمعنا عا لحب والإخلاص
وفاء أمين

[محمد صادق]

الشاعر الجميل .. اشرف الشافعى

لو كانت الغربة بكل تغريبها تصنع شعر صادق كهذا
فحقيقة لا اعلم .. هل نشكرها ام نلعنها
ولكن يبقى الشعر .. ليمسح بعض الالم ولو تكلم عنه
تحياتى لك وحسك الانسانى الشاعر