لو كنت مكانه (كنت عملت شو ؟؟)

[روان الأحمد]

السلام عليكم ورحمة الله و بركاته ،

أعزائي رواد منتدى الترفيه ، اهلا بكم دائما

بدي أعرض عليكم فكرة انشالله تعجبكم وخصوصا أنه نحن في بمنتدى ( والحمد لله ) كله مبدعين و كتاب ومشهورين .... وحتى الا ما بكتب أكيد تأثر بنوعية الكتابة اللي هنا...

الفكرة بتحكي انه احنا كلنا ( الشلة ) الا بتدخل على هذا المنتدى نكتب قصة مع بعض ( مفش حدن احسن من حد )

المهم كل واحد يكتب فقرة من القصة ( على قد ما الله يعطيه ) و يترك سؤال عن حدث من أحداث القصة العضو الا بعده يجاوب عنه بطريقة انه يكمل القصة ...

طبعا بعيد عن منتدى القصة ...

احنا بنسمح تتكون الفقرة من كلمة وحدة بس ، وليس هناك مشكلة لو كانت اللغة عامية ( بس و النبي مفهومة ) ، والطابع تبعها مش محدد ...

الهدف من القصة نتسلى مع بعض ، ونختبر ابداعاتكم اللي دائما مخبينها ، يعني ( بليز ) ما بدنا ولا ناقد هون ، كلنا بنغير الاحداث على مزاجنا ..

هلأ سؤال اللعبة مفهومة ؟؟؟؟

أبتدي أنا و لا لأ

نعمل تجربة مش خطأ ...

أنا إسمي عزوز ، شاب غلابان و رجلي أطول من لحافي ، ساكن هون فوق مخزن أبو محفوظ اللي حالف ما يصحيني كل يوم الا على صوت شعبان عبد الرحيم ، طبعا انت بتسأل كاي رجل محترم ليش ما تشكي عليه لشرطة ، بصراحة أنا بخاف أدخل مركز الشرطة ما اطلع ، و إذا طلعت بخاف يحولوني على الاسعاف ، عشان هيك خليني زلمة ( رجل ) كافي خيري شري ، أصلا أبو محفوظ زلمة منيح لولا هل مية و تسعة و تسعين عيب الا فيه ، فكيف بدك واحد مبهدل مثلي يجرجره على المخافر ، يا شيخ سيبك من أبو محفوظ وشلته الرباعية ( عند 4 نسوان ) ، الله يهد يهودك لهيني عن مشواري ....

( سؤالي للعضو الا بعدي ..فكرك عزوز وين رايح ؟؟)
ملاحظة ( العضو ما يكتفي بالجواب يحط الجواب وكانه يكمل القصة و ما ينسى يسأل الا بعده سؤال )

[لارا المشاق]

لاهيني عن مشواري لشغلي الجديد هاد أول يوم فيه والله كل يوم بشغل جديد شو بدي أعمل اتخرجت من الجامعة بعد خمس سنين شقا وتعتير وما لقيت شغل زي الخلق وهيني مقدم عمليون وظيفة ولهلأ مانقبلت بأي وحدة لأنو ما معي واسطة. واضطريت أشتغل لأنو أبوي معطيكم عمروا من سنة وأنا عم بشتغل لأصرف عإمي و أخوي الصغير وخواتي الثنتين .
لمن أشتغل كارسون بمطعم بتيجي بنت حلال تسأل عن شغل فبوظفوها وبزحلقوني. ويوم سواق تاكسي بقوم أبو محفوظ الله يحفظه بنفس العجلات ليش بصفها قدام مخزنوا بقوم صاحبها يطردني بس بعد مايسجني لأنو ما معي ادفع وانتو بتعرفو أنا بخاف من الشرطة فبقضيها بالمستشفى تبع السجن مغمى علي من الرعبة . ويوم ببيع بالشارع بتيجي البلدية بتشيلني زي كأنوا مافي غيري.ويوم ببيع بمحل آيس كريم بس بطفي الثلالجة بالغلط وبسيخ الآيس كريم بقوم صاحب البقالة يطردني بس بعد ما يجي عبيتي وياخذ التلفزيون والفيديو والفريزر بدل اللي عملتو كمان لأنو ما معي أدفع!!!!!!. ويوم بالسيرك قال بدي ضحك الناس الحق علي بس انطردت قال شو؟؟!! خوفت الناس وشردوا. طب شو أعمل أنا!!!!؟؟؟. والله حالة خليني أسرع للشغل لا يطردوني همي كمان
((سؤالي ؟؟ فكرك شو شغلوا الجديد ؟؟))

[روان الأحمد]

والله حالة خليني أسرع للشغل لا يطردوني همه كمان ، أصل اللي بلاقي شغل هل الايام مثل الا بتصور مع الاميرة ديانا الله يرحمنا و يرحمها ....
وليش أتصور مع ديانا أصلا انا هسع بشتغل شغل احسن منها بمليون مرة ، هيه بتقعد تتصور ، وأنا اللي بوزع صورها أصلا لوما أمثالي ما كان في اميرة ديانا ، ولا أميرة مرسيدس ، المهم هو انا قلتلكم كيف لقيت شغلي ؟؟....أففف ..طيب طيب أعصابكم علي هسع بقللكم وين أنا رايح مش لقيت شغل بياع جرائد في الشوارع ، بيني وبينكم أنا مبسوط كثير من هل الشغلة؛ بتتعامل مع بني آدم مثلك مثله ( هو يعني مش مثلك بالضبط ) بس يكفي انك تمارس النشاطات الحيوية الا بمارسه هو ...
اليوم اول يوم لي في الشغل عمي أبو محمد الله يخليلي اياه دبري هل الشغل و قالي اركز فيه بلكن قدرت تلاقي بنت الحلال ، طبعا أنا ما بدي بنت حلال ( هو انا ناقص ارعي ) ، قلتله لسه مطولين على هل الحكي ، قال بتصدقك لوما بنتي عمرها 10 سنين كان زوجتك اياها ( هون أنا فهمت السالفة كلها أبو محمد برسم علي ) يجازي بلايشه ما لقى مقرود غيري يزوجه لا بنته لو أنا رحت طلبت ايد بنته من حالي برفضها ( شو هو انا بدي اتزوج بالتقسيط !1 مرة بطل ايدها مرة رجلها مرة مش عارف ايش ) افففي يا خي شو بدي بمغص البطن على هل الصبح خليني بحالي .
وهياتني أنا ماشي بآمان الله لما زمور صيارة ( زعطلي ) وفيه واحد مجنون مطلع نص جسمه من السيارة وبصرخ ( ولك عزوز ... ولك عزوز )

سؤاللي ( شو كان بده هذا الشخص من عزوز حتى يزعط عليه ( يصرخ))