الرسالة الرابعة للعاشق المصيف .

[جومرد حاجي]

ملاحظة : هذه الرسالة مكملة للرسائل السابقة
و مرتبطة بها .

*******

حبيبتي ..
صدقيني ، رح تندمي كتير إذا ما تزوجتيني .
أنا ما بحب أحكي عن حالي ، بس أنا كنز
ما لازم تضيعيه . يعني أنا بجنّن ، و شخص حبوب كتير،
و إذا صرتي من نصيبي رح تربحي كتير ،
رح أهريكي غزل و شعر ، صبح و مسا
قبل الغدا و بعد العشا ..
حابب قلك مفاجأة حلوة كتير ، اليوم لما صحيت
من النوم لقيت الحصان تبعي راجع عالبيت
، و بعدين إجا الزلمة اللي اشتراه مني ، لأنو كان عم يدوّر
عليه . فرجعتلو المصاري و خليت الحصان عندي .
شفتي قديش الحصان بحبني ، ترك الزلمة لأنو ما قدر
يعيش معو ، و إجا لعندي ، يعني إذا الحيوان حبني هيك
فكيف أنتي ؟
بكرا لما تصيري مرتي رح دلّلك أكتر من الحصان
اللي قضيت معو عمري كلو .
في شغلة بدي أحكيلك ياها : هي أمي فضحتني بالحارة
وقالتلن أني مجنون و ميت فيكي ،
حتى صار اسمي بالحارة مجنون ليلى ،
و شي بسمّيني قيس ، و شي بسمّيني عنترة !
بتعرفي عم فكّر أكتب فيكي شي ألف بيت شعر ،
مشان ينسوا ألفية ابن مالك ، بس المشكلة ما عندي
وقت ، يا دوب روح عالشغل ، و اهتم بالحصان .
حبيبتي .. صدقيني ما رح تلاقي متلي
أنا بجنن ، لك كتير رائع . يعني إذا تزوجتيني
رح تكتشفي هالشي بسرعة ، لأني دغري رح
فاجئك بكلمات غزل و بوح أحلى من القصائد
اللي عم تقريهن هون و هون ، لك أنا ما بسرق كلمات
متل شباب اليوم و لا بفكر أصلاً فيها .
الشي اللي بحس فيه بحكيلك ياه دغري ،
يعني مثلاً هلا أنا مشتقلك ، فبقول بطريقة شعرية :
إني خيرتكِ فاختاري
ما بيني و بين ابن المختارِ
لا تقولي هداك غني
لأنه ليس كل شيء مصاري
إذا كان هو غني فأنا فارس مغوارِ
أكيد عجبتك القصيدة كتير حبيبتي ، و أكيد كمان
رح تقرري أنك تتزوجيني .
بس شوفي يا بنت الحلال ، قبل ما يصير شي رسمي
لازمني طقم رسمي ، هههههه ، عم امزح ، شفتي
حتى دمي خفيف ، الكل هيك بقول عني .
شوفي يا بنت الحلال ، أنا بحب مرتي تسمع
الكلمة ، يعني قومي بتقومي ، عدي بتقعدي ، لا تروحي
على بيت أهلك ما بتروحي .
و متل ما بقول المثل إذا كان حبيبك عسل لا تلحسو كلو .
مو تشوفي قلبي طيب ، فتصيري بدك تتحكمي
فيني ، علي الحلال بشوهّك ! فديري بالك ، بس
أكيد أنتي عاقلة و فهمانة و مو من النوع المتمرّد .
و أخيراً بحب قلك شي مهم و خطير ، أنا هلا نزحت
من بيتنا بسبب الحرب ، و بيتي انقصف
يعني إذا تزوجتيني رح نسكن بالإيجار ،
و استأجرت غرفة للحصان كمان ،
و إذا ما عجبك الوضع ، فبكون أحسن .

جومرد حاجي

[راحيل الأيسر]

ماشاء الله أخي جومرد

لك قدرة ترفيهية عالية أخي ، وخيال كوميدي رهيييب .. أحييك وأرحب بك دائما في الترفيهي ..


بتعرف معنى اسمك ؟ بظنه فارسي مؤلف من كلمتين ..

جوان + مرد .. أي الرجل الشاب الفتي ..

ولو كنت مخطئة صححلي .. بس هيك حللته ..


شكرا لمشاركاتك أخي الكريم .

[جومرد حاجي]

المشاركة الأصلية كتبت بواسطة راحيل الأيسر

ماشاء الله أخي جومرد

لك قدرة ترفيهية عالية أخي ، وخيال كوميدي رهيييب .. أحييك وأرحب بك دائما في الترفيهي ..


بتعرف معنى اسمك ؟ بظنه فارسي مؤلف من كلمتين ..

جوان + مرد .. أي الرجل الشاب الفتي ..

ولو كنت مخطئة صححلي .. بس هيك حللته ..


شكرا لمشاركاتك أخي الكريم .

شكراً أختي راحيل على هذا المرور الجميل
سررتُ بتعليقكِ ، و تشجيعك الرائعَين .

جومرد اسم كوردي حسب معرفتي : و يعني كريم ، أو الشهم الكريم .
و ربما يكون له بالفارسية معنى آخر . و أظن أنه موجود باللغة التركية أيضاً .
لكِ مني أجمل تحية ، أختي راحيل الأيسر ، دمتِ كما تحبين