مشروع النهضة يا مشروع

[عبد الحميد بدوى]

مشروع النهضة يا مشروع
مشروع النهضة يا مشروع
وليه تنتخب شخص
طالما ممكن تنتخب مشروع
يامسمع يا مسموع
يا مشبعنا بعد جوع
هو ده اللى
هايوقف مصر على رجليها
من النهاردة مفيش ركوع
قولوا فيه قصايد
وأنكتب فيه كتب
قولوا مشروع حياة
وقولوا طوق نجاة
وقولوا فيه الخير لكل البشر
وقولوا كل حاجة فى مصر
هاتغنى حتى الشجر
وقولوا هو اللى هايخلى
مصر هاتسابق الزمن

وقولوا هو الملاذ وهو الامل
وهايحقق كل احلامك
وهو الحلم وهو السكن
وقولوا دا مشروع وطن
وقولوا هايحتاج كمان
كام مليون فرصة عمل
وهو ده اللى المشروع
اللى بجد هاينقل البلد
أفرح وأرقص يا ولد
وقولوا كمان أشتغل عليه
مهندسين وخبراء وأقتصاديين
وعلماء فى الطبيعية
وعلماء فى الفلك
وقولوا فيه كلام كلام عجب
وفى الاخر طلع المشروع قلة أدب
المشروع الوحيد اللى
محتاج مشروع
أفرحوا وغنوا يا بشر

واللى يقولك أصله
طلع مشروع فكرى
وفى ناس كتير
بتقول أن فكرى أنتحر
وللاسف كل وكالات الانباء
مش قادرة تتأكد من صحة الخبر

أفرح وأرقص يا جدع
انا بحب الاخوان
وبحب الرئيس المنتخب
وراضى دايما بالقضاء وراضى بالقدر
بس كل أما أشوف حالى أتحسر
أصل أنا حالى من حال الوطن
وعايش الحياة مستنى الكفن
ولو سألونى نفسك فى أية
أقولهم نفسى أشوف مشروع النهضة
ولو حتى من بعيد
نفسى ياناس المح طيفه
نفسى أخده بالحضن وأبوسه
وأقوله أتأخرت ليه
وحشتنى يا أبن الاية
لو تعرف أحنا بنحبوك قديه
كنت أتخلقت من العدم
أفرح وأرقص يا جدع
نفسى أشوف كل حاجة فى مصر
لابسة جديد فى جديد
وما يبقاش فيه اسياد وعبيد
نفسى أشوف البسمة فى عيونك
نفسى أشوف ضحكتك وجنونك
بدل حزنك وجرحك وشكلك الكئيب
ليه يا وطن حتى عن نفسك بقيت غريب

الشاعر
عبد الحميد بدوى