عربي وما بحكي عربي

[أحمد قدورة]

( عربي وما بحكي عربي ) بقلم احمد قدورة
____________________
يعني اليوم حبيت أكتبلكم بالعامّية
ما بعرف ليش ؟؟ هلأ هو الأفضل نكتب بالفصحى ,, بس في ناس ما عمتفهم بالفصحى
واذا كتنبنا العاميّة بيحكولنا لك شو عامل بحالك , حاسينك عمبتبيع بندورة بسوق الخضرة
يعني بحيروا الواحد , شو ما عمل بحكولوا غلط
هي المشكلة إننا منسمع لأي حدا
والمشكلة الأكبر أنو كل الناس حدا
بس في كم شخص منستثنيهم
وعمرهم ما طلبوا منا نكتب بالعامّية لحدا
كمان ممكن بالعامية كتير ناس ما يفهموا الحكي
ممكن بعض الشعوب العربية تفهم حكيي وممكن بعضها الآخر يحكي شو بخبص هاد
كتير عال ,, يعني كمان العامية ما كل الناس بتفهمها
طيب رجعنا للبداية نحكي بالفصحى
تعالوا نتخيل كل الشعوب العربية بتحكي بالفصحى
صدقوني بدنا سنين لنفهم على بعض
بتعرفوا ليش ؟؟ لاننا بعيدين كتير كتير عن الفصحى
جرّب اقرأ بيت شعر لعنترة رح يطلعلك بالبيت الواحد عشر كلمات بالفصحى ما بتعرف معناهم
معقول العرب ما بعرفوا معنى الكلمات العربية
صدقوني معقووووول
هلأ ليش وكيف ومين اللي وصلنا لهون ما رح نفوت بهالتفاصيل
بس الكل بعرف انها حرب غربية ضد اللغة العربية
لأ والمشكلة الأكبر إننا نحنا العرب ما منشجع بعض لنحكي بالفصحى
يعني جرب احكي مع رفيقك يومين بالفصحى وشوف كم انتقاد رح يجيك
أتحداك اذا ما بتقرف العربية والفصحى لأجل حكيهم
يعني الحل انضلنا متخلفين نحكي كلمات شي عربي وشي مش عربي
واحنا مكتوب على هويتنا عربي ابن عربي
ويا ريت في من هلحكي , والله حكي جرايد
انا هلأ بكفيني حكي , حكيت كتير عن موضوع البعض بفكروا انه ما بستاهل
وما بدي احط خاتمة لكلامي , لانو ما بتلزم بالعامية , المهم تحكي وتحكي وتحكي والكل عمبسمع
ولما تكتب بيت شعر بالفصحى العربية بتلاقي ما حدا بيسمع ويمكن بصفقلك واحد او تنين

بقلم العربي : أحمد قدورة
12-5-2012