اسكتش . كراسة الشروط .عامية مصرية

[عبدالحليم مدكور]

المقدمة ..........


فتح المزاد ع الصبايا قربوا يا شباب


علام وخفة وادب شبكة وكتب كتاب
***********


قبل المذاد انا عاوز اقول كلمة


عشان نكون واضحين


مش أي حد يقف هنا


الا اللي احددهم انا


وعشان نريح نفسنا


عملنا كراسة شروط للمطلوبين
***********


واهم حاجة في الشروط


شباب يكونوا موظفين
***********


عشان بيبقى دخلهم


ثابت كدا طول عمرهم


ومعاش بيبقى بعدهم


والكشف والتامين
***********


اما اللي لسه شغلهم


مجاش لغاية عندهم


القهوة تبقى احسنلهم


لحين صدور قرار التعيين
***********


قهوة بلدنا مركز شباب


وعليها كل شبابنا اصحاب


مستنيين م الدولة جواب


لا مؤخذة يا اخواننا العاطلين
***********


اللي الحكومة موظفتوش


يطلب جواز هنقوللو ملوش


سواء معاه او كان معهوش


الرد واحد في الحالتين
***********


صاحب الوظيفة مننا


هو ده عريس الهنا


لو سنو كان خمسين سنة


ومرتبو ميه وخمسين
***********


وانته اللي جابك ايه هنا


هيه ناقصه مغفلين


فلاح حقير هلفوت عويل


مفيش جواز للفلاحين
***********


فتح المزاد يا حضرات


عاوزين مهور بقى بالملايين


فتح المذاد على بايرة بالف


حد فيكم قال الفين


فتح المذاد على بايرة بالف


حد فيكم قال الفين

*********************************************
نص الاسكتش

كراسة الشروط

يجلس كل من الحاج قرني – ابو العروس - والحاج خليفة – عم العروس - وهم في حالة تاهب قصوى لاستقبال العريس المنشود لعروسهم "بايرة" الذي جاء لخطبتها فور حصوله على وظيفة . في احدى شركات النظافة.
- قرني : يعني العريس أخر أوي مصيبة لا ميجيش والبت تقعد في ارابيزنا كده على طول دا احنا ما صدقنا إن فيه عريس موظف رضي يخطبها.
- خليفة: يا جدع مية مره اقوللك متبقاش خفيف العريس جاي جاي دانا اكدت عليه النهاردة في الغيط . واللي مأكد لي انه جاي كمان اني شايفه بعنيه وهوه بيبيع البهايم في السوق يعني جاهز ومستعد . خليك تقيل امال عشان نعرف نجوز البت جوازه حلوه .
يدق الباب فيقوم خليفة عم العروس ليفتح في حين يعتدل قرني في جلسته منتظراً دخولهم لينهض واقفاً
- قرني : يا مرحب يا مرحب اتفضل يا معلم سداد اتفضل ادخل يا عنتر بيتك ومطرحك
يصافح العريس وابوه عم العروس وابوها وياذنوا لهم بالجلوس فيجلسوا

- قرني : مرحب ******** - سداد وولده : الله يرحببك
- خليفة شرفتونا ******** - سداد وولده : يجعله عامر
- قرني : منورين ******** - سداد وولده : دا نوركم
- خليفة اهلا وسهلا ******** - سداد وولده : اهلا بيك
- قرني : مرحب ******** - سداد وولده : الله يرحببك
- خليفة منورين ******** - سداد وولده : دا نورك
- قرني : انجزوا ******** - سداد وولده : اهلا بيك
- قرني : ما تخلص يا عم انته تخشوا في الموضوع وتقولوا جايين ليه
- سداد : احنا بالصلاة ع الحبيب كده جايين النهاردة نشرب معاكم الشاي عشان بصراحة كده احنا معندناش شاي ولا سكر في البيت والتموين راح علينا الشهر ده .
* يقهقه سداد وولده بغباء
- قرني : ايه ... طاب سكي ع الشاي ياوليه

- سداد : قصدي يعني نشرب الشاي ونتكلم كلمتين كده
- خليفة: ايوه كده اتعدل
- سداد : بصراحة كده ومن الاخر احنا جايين نطلب ايد بنتك لابننا عنتر .اصل العيال بيحبوا نفسهم من زمان . بيحبو نفسهم اوي . واحنا قلنا ندخل الباب من شباكو واهو برضو يبقى زيتنا في دقيقنا ونعمل قرصتين وناكلهم وجحا برضو اولى بلحم طوروه .
* يقهقه سداد وولده بغباء . ويضحك الحاج قرني ضحكة نفاق صفراء.
- قرني : ومالوا داحنا نلبسها بنطلون جينس وبدي ونوصلها لحد باب البيت ولو الباب مقفول ننططها من الشباك كمان .
- سداد : ما اهو دا عشمنا برضو .
- قرني : بص انت دخلتو قلبي من أول . امبارح . بس اني راجل ديموقرطي . ايوه انا ابو العروسه بس اللي يحل ويربط في الموضوع . هوه خليفة اخويه . خال العروسة . والراي في الاول والاخر ليها هيه برضو.
- سداد : معلوم برضه معلوم .... طاب ناديها لنا كده ناخد رايها .
- قرني : نادي عليها يا خليفة يا اخويا
- خليفة: انتي يا بت يا "بايرة " . انتي يا بنت ال..
* تدخل العروس "بايرة" مسرعة تلقي السلام على عمها خليفة والتي تظنه خالا لها باعتبار انه اخا لابيها . ثم تهرول في اتجاه العريس لتصافحه .
- بايرة : ايوه يا خال .... سلام عليكم ازيك يا عنتر
- قرني : خدي هنا يا بت
- بايرة : حاضر يا باه
- قرني : بوسي على ايد عمك يا بنت
* تقبل يد عمها
- بايرة : اوامرك يا خال
- خليفة: بصي يا بت الواد عنتر ابن عمك سداد جاي يطلب ايدك انتي رايك ايه ياللي يجيكي مصيبة تاخدك.
- بايرة: بحبو يا خال بحبو. بحبو يا بايه . بحبو . ويلي ويلي من سمارو ........ يكوي قلبي يذيد في نارو بحبو .
- قرني : السكوت علامة الرضا غوري ادخلي جوه .
- خليفة: ومدام البت موافقة يبقى مبروك عليكم .
- سداد : نتكلم في المهم انتو طلاباتكم ايه بسرعة كده و نخلص قوام قوام عشان فيه
" معزة " شرق البلد عاوزين نروح نخلص فيها .
- خليفة: بالنسبة" للمعزة " بتاعتنا قصدي . يعني العروسة ... قلبت دماغي. احنا ما عندناش طلبات كتير احنا زينا زي اهل بلدنا وبنتنا ما تقلش عن أي بنت في البلد .
- قرني : اسملله عليها حلاوة وادب وعلم وفن وهندسة . حافظة الاغاني كلها وتقعد قدام التليفيزيون كده تسمع المسلسلات تسميع والافلام عربي وافرنجي وما بتقراش الترجمة . مش عشان بتفهم انجليزي لا سمح الله لا عشان نظرها ضعيف حبتين وعندها حول مزمن . وبله منغولي .والكلب عضها من اسبوعين.
- خليفة: وخللي بالك بنتنا شغالة وبتجيب عيال واللي عاوزها يتاقلها بالمال .
* يقول خليفة هذه الجملة في حين يخرج قرني كراسة الشروط من اعماق السديري الذي يرتديه تحت جلبابه.
- قرني : وادي طلباتنا.خد يا خليفة يا اخويا قرا لهم كراسة الشروط .
* يتناولها خليفة منه ويبدأ بأمطارهم بالطلبات وكانها طلبات الاحاطة السنوية بمجلس الشعب.
************************************************** ********
وبعد قرائة كراسة الشروط
- سداد : كفاية يا جماعة ابني تعب من قولة موافق وانا تعبت من قولة سداد . انا عندي سؤال ليك يا حاج قرني لو انته مكاني دلوقت وبتخطب للبقف ابنك ده هتقبل ان حد يشرط عليك كل الشروط دي . في زمتك انته ساعت ما جيت تتجوز جبت واحد من الالف من الحجات دي .
* وقبل ان ينطق الحاج قرني ياتي " رويتر" من خارج الدار وصوته يسبقه
- رويتر : الحق يا حج قرني . الحق يا حج قرني . بنتك متجوزه عرفي
- قرني : بتقول ايه يا وله
- رويتر : البت "سهتانة". بنت المعلم " طناش " قفشوها مع الواد كوكو بتاع الدوكو . وطلعت متجوزاه عرفي ولما اتكشفت قرت على كل زمايلها . البت شربات متجوزه الواد سكر عرفي وبيدوبو في بعض . والواد نور متجوز البت نجفة عرفي ومعلقين مع بعض وبنتك بايرة متجوزة الواد عدول العسول عرفي
- قرني : هيه حصلت لحد عدول العسول اني لازم اشرب من دمو ودمها اني هقتلهم هماالاتنين سيبوني
- خليفة: يا حج قرني هدي نفسك
- قرني : عرفي الزاي حد يفهمني
- خليفة: عرفي يعني سرقه . يعني جواز في الضلمه يا حج قرني
- قرني : اعوز بالله . لا حول ولا قوة الا بالله
- خليفة: بس تعرف ياحج قرني انته السبب
- قرني : أني
- خليفة: ايوه انته .
- قرني : ابوس على ايدك فهمني اني السبب الزاي
- خليفة: ايوه انته السبب. دا النبي عليه الصلاة والسلام قال "اذا جائكم من ترضون دينه وخلقه فزوجوه " وانته الفلوس عمت عينك وقلبك ... بناتنا مش لعبه بناتنا مش تجارة . وانته استغليت بنتك للي يشيل ويحمل ويدفع اكتر. طول ما فيه كراسة شروط هيبقى فيه خراب بيوت .
- قرني : ملعونة كراسة الشروط .ملعونة كراسة الشروط .ملعونة كراسة الشروط .ملعونة كراسة الشروط .
***************** ستار ***************