ترحيب بالشاعر الفلسطيني المبدع نجيب صبري ...

[عيسى عدوي]

أيها الأخوة والأخوات في منتدى الشعر العامي والنبطي أرجو ان ترحبوا معي بشاعر كبير من شعراء فلسطين المشهورين وهو شاعر وباحث فس الشعر الشعبي ..وهذه أول هداياه لنا في هذا المنتدى ..,نتمنى أن يكون بيننا دائما ..ألا وهو الشاعر نجيب صبري ..من كفرراعي


الأخ الزميل الشاعر عيسى عدوي المحترم
،السلام عليكم ورحمة الله وبركاته وبعد
فقد كان من دواعي سروري أن أتلقى رسالتكم الأخوية الأدبية التي عبرتم بها عن مشاعركم نحوي ونحو الأدب الشعبي الذي أكِنُّ له ولشعرائه كل احترام ويشرفني أن أخط لحضرتكم الكريمة هذه الرسالة المتواضعة كمقدمة لرسائل لاحقة تحمل في ثناياها لواعجنا الشعرية الثقافية إن شاء الله ويسعدني أن أقول أنني والحمد لله على وشك الانتهاء من موسوعة أعلام الشعر الشعبي الفلسطيني كم يسعدني أن أطَيِّرَ لحضرتكم شيئا من باكورة التعاون الأدبي وهو قصيدة بعنوان (سهرة مع القمر
آملا أن تحظى بشيء من رضاكم


سَهْرَة مَع القَمَر

[poem=font="Simplified Arabic,6,,normal,normal" bkcolor="transparent" bkimage="" border="double,4," type=2 line=0 align=center use=ex num="0,black"]
مَرَّة عَزَمْتِ القَمَر تا نِسهَرْ = وتَ نْشوف مينِ ال عَالسَّهَر أقْدَرْ
لَمْلَم ثِيابو مْنِ السَّما وْ عاطولْ = قَلّي أنا جاييك يا أسْمَرْ
ولَمّا وِصِلْني وْصِرِت بي مَشْغولْ = وحَقّو عَلَيّي ضَيِّفو وْأكْثَرْ
قَدَّمْتْلو قَلْبي صِدِر مَعْمولْ = ورَشّيت عُمْري عَ الصِّدِر سُكَّرْ
قُلْتِلّو جَوِّد لَ تْكُنِش مَخْجولْ = واشْرَب حَنيني خوف ما تِزْوَرْ
تَ نْظَل إنْتِ وْأنا مُش معْقولْ = نِحْكي وْنِشْكي حَظّنا مْعَثَّرْ

وبَعْدِ الضِّيافِة تْبَسَّم وقَلّي = ي الله تَنِطْلَع بَرَّة نِتْكَسْدَرْ
بْظِلّو مَشيت ، وهو مَشى بْظِلّي = وشَدّيت بيدو خوف لا يِعْثَرْ
ولَمّا وِصِلْنا عا سَفِح تَلِّة = نورو سَبَقْني ، وْعَالسَّفِح نَوَّرْ
وِتْوَحَّدِت بِالنّل انا كُلّي = وحَسّيت روحي اطّير وتِتْبَخَّرْ
ساعيتْها ما عْرِفِت شو صَرْلي = صوتي اخْتَفى ، وِالمَدْمَعِ اتْحَجَّرْ
وجَنْبي القَمَر بيصيح يا خِلّي = هَالقَدّْ ذُبْتِ بْرَوْعِةَِ المَنْظَرْ
قُلْتِلّو ما بْتِعْرِفِش شو العِلّي = يا قَمَر يا مَحبوبي يا أشْقَرْ
هذي النَّلِّة سَلِّةِ الغَلِّة = أرْضي اللّي بَيّي بْساعِدو عَمَّرْْ
شُفْتو أنا عَ تْرابْها يْصَلّي = وقَدّيش إلْها هَلَّل وكَبَّرْ

كانِ الفَجِر يِصْحى وْمَعا هِمّي = بِتْقول عَنّو الزّير أوْ عَنْترْ
ويِسْرَح مَعِ التَّسْبيح وِالنِّجْمي = ومِن لَهِفْتو للأرِض ما أفْطَرْ
حالِف مَيِتْناوَل وَلا لُقْمي = إلّا عَ سَفْحِة تَلِّنا الأخْضَرْ
وِمْنِ السَّفِح يِطْلَع عَلى القِمّي = وراكِب بِهيبِة حْصانّا الأحْمَرْ
يَ حْصانّا بِالسَّرِج وِالرَّشْمِة = ما أرْوَعك تِفْتِل عَلى البَيْدَرْ

وقَدّيش أبويي بَقى يْحِبِّ امّي = قَدِّ النَِّحِل للزَّهِر بَل أكْثَرْ
بَذْكُر إلو يْناديها يا نَسْمِة = لا تِبِعْدي خَلّي الهَوا مْعَطَّرْ
لا تِبِعْدي وْلَ تْغَيِّبي البَسْمي = عَن وِجْهِكِ السُّبْحان مَن صَوَّرْ
وبَذْكًُر أبويي شَدْني بْكُمّي = وقَلّي يَ إبْني ان شا الله بْتِكْبَرْ
مِثْلِ الأرِض إنْتي إلي نِعْمي = وأغْلى مِنِ الياقوت وِالجَوْهَرْ
حبّيتْكُم يا روحي يا دَمّي = يا سَلْسَبيلي يا أنا الكَوْثَرْ
وميجَن ، وعَتَّب ، وابْدَعِ الكِلْمي = وتْمَوْسَقِ المَوّال ، مَ تْكسَّرْ
وغَنّى أبويي واتْقَنِ النَّغْمي = ودَلْعونا مِنْها كْثير بَتْذَكَّر [/poem]

[poem=font="Simplified Arabic,6,,normal,normal" bkcolor="transparent" bkimage="http://montada.aklaam.net/images/toolbox/backgrounds/25.gif" border="double,4," type=2 line=0 align=center use=ex num="0,black"]
عَلى دَلْعونا وْعَلى دَلْعونا = فْلِسْطين بْلادي إمِّ الزَّيْتونا
***
عايِد يَ بلادي ي بْلادي عايِدْ = وكُلّي أشْواق وحُب وقَصايِدْ
فيكِ اتْرَبّينا عَ بأحْلى العََوايِدْ = عِلم وثَقافِة وْأدَب وِفْنونا

راجِع يَ بْلادي وانا الجِنيني = العُروبِة بْدَمّي ، واسْمي فْلِسْطيني
وفي حَلْقِ العِدا شوكِة وْسِكّينِه = والله أعْطاني القُوِّة وِالعونا

أنا مِن جَبَل جَرْزيمِ العالي = لاعَبْني الهَوى وعيبال قْبالي
وِجْبالِ النّار تْلَبّي طَوّالي = لَمّا بِتْنادي إمّي الحَنونا

أنا مْنِ القُدْس مْنِ الجُرْحِ النّازِفْ = أقْوى مْنِ القَلْعَة بْوِجْهِ العَواصِفْ
مِتْوكِّل عَ الله ، غيرو مِش خايِفْ = خَلّي اللّي يْكيدو يْظَلّو يْكيدونا

أنا مْنٍِ كْروم وعِنَبِ الخَليلي = ومَيِّة ، وْبَيّارَة بْسَهَِل قَلْقيلِه
راجِع مِن بَعِد غيبِة طَويلِه = بِتْراب ِ بْلادي كَحِّل لِجْفونا

سامِع رام الله تْنادي عَالبيرِه = ومِن حُبِّ بْلادي قَتْلَتْني الغيرِه
طيري يَ مْهيرَه ، يَ مْهيرَه طيري = لَ عِنْدِ حْبابي إلْيُذْكُرونا

نِحْنا مْنِ الأقْصى ، وْعَالأقْصى جينا = غايِة أمَلْنا وْحَبِّة عينينا
مِنْظَلِّ انْغَنّي لاجْلِ فْلِسْطينا = جَفْرا ، وْعَ اليادي ، وْعَلى دَلْعونا

راجِع عَ بْلادي وطولْكَرِم بِدْها = أحْلى الشَّباب تْروح وتِوْرَدْها
بْعَزْم وإرادِة الله أيَّدْها = وعِشْتي يَ بْلادي ومَجْدَِك مَصونا

يا بَحَر يافا موجَك بينادي = وِالرَّمْلِة وْحيفا عَروسِ بْلادي
وِاللِّد وعَكّا صورَه بْفُؤادي = عاشَت في قَلْبي وجُوّا لِعْيونا

يا صَحْرا النَّقَب مَحْلا رِمالِكْ = بَعْدو عالمُهْرَه راكِب خَيّالِكْ
صَفْحَة مْنِ الذَّهَب لَوْحِة جَمالِكْ = وأغلى مْنِ التِّبْر وكَنْزو المَدْفونا

على دَلْعونا عَلى دَلْعونا = يا رَبي جازي للّي بيخونا [/poem]

وعِنْدما اسْتأذَنَ القَمَر بِالانْصِراف ، تَمْتَمْتُ بَيْنَ يَدَيْه :-

[poem=font="Simplified Arabic,6,,normal,normal" bkcolor="transparent" bkimage="" border="none,4," type=2 line=0 align=center use=ex num="0,black"]
يا قَمَر ظَلَّك هان عا حَدّي = لا تْروح وتُتْرُكْني أنا وَحْدي
بَعْدَك لَمين الروح بِدْها تْبوحْ = بِالآه ، بِاللَّوْعات ، بِالنَهْدي
بْأنّات قلْبْ مْعَذَّب ومَجْروحْ = بِطْيور بِدْها اطّير ما تْهَدّي
يا قَمَر لَوْ تِسْمَح قَبِل مَ تْروحْ = تا سَمّعَك مِن خاطْري مَوّال
ذِكْرى لَحَتّى تْحِن للعَوْدِة [/poem]

أووووووووو.....ف

[poem=font="Simplified Arabic,6,,normal,normal" bkcolor="transparent" bkimage="" border="none,4," type=2 line=0 align=center use=ex num="0,black"]
دَخيلَك يا قَمَر لَ تْغيب (عَنّي) = ولَ تِزْرَع في القَلِب ألْفين (عَنّي)
أمانِة تْزورْني ، وعَ العُمُر (عِنّي) = لَتِقْهَرْني بِهَجْرَك وِلِغْيابْ ودمتم لنا سالمين [/poem]
الزميل نجيب صبري
والسلام عليكم ورحمة الله [/CENTER]

[إياد حياتله]

[frame="7 80"][poem=font="Traditional Arabic,7,darkblue,bold,normal" bkcolor="transparent" bkimage="" border="none,4," type=3 line=0 align=center use=ex num="0,black"]
أهلا وسهلا طلّ عَ السّاحة نَجيبْ
زجّال أصلي وشاعر معلّم نَجيبْ
حقّك علينا كبير وَلكْ لازم نِجيبْ
سجّاد أحمر نفرشوا لشيخ العتااابْ[/poem][/frame]