على الناصية

[وليد شادى]

قاعد على ناصية بيتك ومستنيك
بقالى زمان شايفك وسامع حكاويك

من اول ما جيت الدنيا بندهلك واناديك
ومعاك من الصبح بعد ادان الديك

ولحد ما تغمض عيونك عن الى بوريك
تلاقينى بعدها فى منامك امنيك

انطق على لسان العدو والحبيب
بالى يشقلب كيانك وبالى يرضيك

دايما كلمتى فى ودنك ليه وليه لا
ازاى هترضى وانا جواك بعصيك

انا الخوف الى لو عبدته استعبدك
والى لو نسيته بالى خلقك نسيك

شغلتى العب عليك لان ملكاش امان
الاعبك العمر كله وممكن ربنا ينجيك

ملكتك بكيدى ليك او اكاد املكك
وكل الى تفتكره ليك اسخره ضدك

انا الطاووس لبست قبلك ثوب الصلاح
تستقبل الحق ولا هواك شرعك

وان دعيت واخلصت الدعاء اسال
بتدعى الاهك ولا بتامر عبدك

واعرف ان الدنيا مسرح مليان عجايب
تشوف وتتعلم او تنكشف عبرك

دخولك فيه محتوم وخروجك محسوم
انت وشطارتك ازاى تقضى فيه وقتك

خدها صريحة الضعيف الى يهين ضعيف
اظلم وخون اضعف من راح تشوف نفسك