[د.إيهاب فؤاد]

حرة صحيح تكتبى وتقولى مافى كلام
بس الحقيقة إننا بنعيش على الأحلام
ياما كتير قبلنا نسجوا القصيد ايام
وسنين كمان يتغنوا وبقى كلامنا كلام
ياست حورية احنا ماقلناش حاجة
بس الحكاية إننا عايشين ولا حاجة
عايشين وكأننا من جوه تلاجة
أفكارنا متلجة داخل فيريز ديب
كل اللى يرفع راسه يموت من التعذيب
كل اللى يشكى همه شمسه ونهاره يغيب
قوليلى كلمة كدا احنا مكانا فين ؟
قوليلى فين مصرنا، فين الحضارة فين ؟؟
قوليلى فين التاريخ اللى انكتب بإيدينا
وفين ولاد البلد فى الشمس ضليله
وفين ذوات الهمم بايتين فى تخشيبه
وفين رجال الدعوة ياأم الكلام طيبه
وفين أساتذة جامعة وبلدنا منهوبة
وفين تراب أرضنا وحقوقنا مسلوبة
وفين نصيب الغلابة فى دنيا معطوبة
بالله عليك كدا ماسمعتى عن أكرم
زهيرى من برنا مات جوه زنزانة
حرموه من الأدوية وقلوبنا تعبانه
كان شاب فى همته وشبابه عنوانه
وكان مهندس كمان سبحانَ مين زانه
خدوه فى ليلْ غيله ورموه بزنزانه
مارجعش ياولداه ولا حد شاف حاله
شفتى القضاة فى بلدنا يوم الإنتخاب اللى فات
إزاى يدوسوا عليهم ويضيّعوا المقامات
فاكره جيهان فى الرمل ؟
وقفولها على الأبواب
منعوا كمان أنصارها يتزينوا بحجاب
وخيول كتير جرارة واقفة على الكورنيش
ياخدوا اللى بيصوتوا ماسكين كتير تقفيش
عايزين يهدوا الدايرة ولا يخافوش تهويش

أقولك إيه ولا إيه ماهى صحيح حرية
بس الحكاية يبدو إنها مكفية
"حر أنا فى كلمتى وأنتو كمان أحرار"
يارب يا أستاذة يطلع لليلنا نهار