بتعرفو كيف الأردني القُح بيحكي إنجليزي ؟
اليوم اكتشفت !
كنت بشتري فواكه مِن "بِكب" واقف ع جنب الشارع، فمرّت وحدة أجنبية و وقفت ومسكت حبّة "كاكا" !
الولد البيّاع طار عقله وصار يتحفتل حواليها وانعجق بمجرّد حضورها -مع انها عوّاية ع الآخر، بس خلص..أجنبية !
بتسأل عن سعر الكاكا !
الولد ما فهم إنها بتسأل عن السعر، فكرها غشيمة "كاكا" فانطلق يشرح لها فوائد الكاكا وطريقة أكلها، بالإنجليزي الأردني -بعد أن نعّم نبرة صوته بطريقة بلهاء-:
" هاد كاكا..كتيير زاكي..شيلي قِشرة..كُلي جوّا..زاكي كتير" !
لم تفهم الأجنبية شيئاً، وهي ليست انجليزية أصلاً، بل آسيوية -صينيّة على الأرجح- !
قلت للولد : بس تروّح وتحط راسك ع المخدّة تنام، تذكّر كيف كنت تحكي انجليزي !
الولد انصفر !
صاحبه وقع عن الكرسي من الضحك !
حكيتله لا تزعل، أنا كمان مرّة حكيت لأجنبي "تفدّل" بدل "تفضّل" !
إنو هيك صار انجليزي أو إنو رح يفهم !