اقتباس:
المشاركة الأصلية كتبت بواسطة عبدالكريم قاسم
اختي ثناء جمعة مباركة عليك وعلى احبائك
ليس المهم الالقاب دكتور او بروفيسور المهم احيانا انا برتاح لما بعطي الانسان قدره اتمنى ان تدفعك هذه الالقاب لمتابعة الدراسة والحصول فعليا عليها
|
الله يبارك فيك يا أخي الطيب وإن شاء الله تكون هالجمعة جمعة الفرج والخير وإحلال العدل في الأرض .. يا رب !
الألقاب أخي عبد الكريم هي جزء من الرتوشات والماكياجات والإكسسوارات اللي بيستخدموها الناس الأولانيين ( اللي من تحت لتحت ) حتى يأثروا في نفوس العباد( اللي من فوق لفوق )..ويا ريت كانو بيستاهلو ...متل ما بيقول المثل ..من برا خام من جوا سخام ..وينك يا سمر ..الله يذكرك بالخير يا سمر عيد ..علوا تجي تشرحيلنا مصطلح ( من برا خام من جوا سخام )...
بالنسبة إلي أنا همي فعلاً آخد الدكتوراة وصدقني مو كرمال اللقب....كرمال إني أقول كلمتي وأخلي الكل يسمعوها حتى لو كانو طرشان ...( في الوسط العلمي طبعاً ) على كل حال شكراً لتشجيعك وإطراءك.
اقتباس:
المشاركة الأصلية كتبت بواسطة عبدالكريم قاسم
المهم
التربية صعبه والمفاهيم التي يلزم ان تغرس في ذهن الابناء يجب ان تكون ايجابية . انا اعاني من الخوف على ابنائي من الوقوع في مأزق الطيبة والسذاجة حتى لا يقعوا فريسة لهؤلاء الخبثاء والمستغلين لذا اجد صعبا احيانا ان اجعل ابنائي في هذا السن ان يحذروا من الاخرين حتى لا الوث مفاهيمهم عن الحياة وحتى لا اعدم الفضيلة في نفوسهم لذلك اتجنب تحذيرهم مباشرة من افعال هؤلاء واكتفي بالتلميح ولا ادقق على الامر بعناية. بل استغل حديثهم عن طالب سرق قلم او ضرب طالب آخر او افسد كتبه او اي فعل ليس سويا وهنا اتدخل بالتحذير . هل هذا يكفي ام ان هناك طرقا اخرى تفيد في التربية دونما زرع عنصر الخوف من الناس في نفوس الابناء .
؟؟؟؟؟؟؟؟
باين دخلنا بالجد وما ضل ترفيهي
بس هالمرة وخلاص مش رح اعيدها
|
ولا يهمك أخي العزيز ...الأولاد بيستاهلو تدخل في الجد كرمالهن ...خود راحتك وإدخل في سابع جد ...
أطباء الصحة العامة ( الجسدية ) بيقولو أنو ضروري تعرض أولادك لشوية أوساخ ..حتى يكتسب الجهاز المناعي عندهن القوة على مقاومة الجراثيم ( الله يفرجينا فيك يوم يا جرثومة ) ..لا تواخذوني ..انقطع الإرسال شوي ..راجعين
.................
عودة الإرسال : والعوامل الممرضة بأنواعها المختلفة ..وأنا شايفة أنو هالكلام صحيح وبينطبق على اكتساب مناعة للصحة النفسية ضد الجراثيم النفسية متل الغش والكذب ..وغيره وسواته ..مثلا ً إذا وقعت التفاحة من إيد ابنك الصغير على الأرض شو لازم تكون ردة فعلك ؟ ما تقلو روح كبها أو تولول عليه ...لأ.. بيكفي أنو يغسلها لإزالة الأوساخ الظاهرة ويقضمها بالهنا والشفا وما في داعي للوسوسة أو تقلو أكل منها الشيطان لازم نكبها .....أما الجراثيم اللي علقت فيها فهي طيبة المذاق ( بروتين ) خليه ياكلها ..وتوكل على الله ..
العناية الزائدة من الآباء والأمهات متل التعقيم للأيدي والملابس وكتر الوسوسة غلط ..لأنو بتخلي الجهاز المناعي ضعيف والطفل رهيف تجاه العدوى بأي نوع من الأمراض ..والصحة النفسية نفس الشي كمان بدها اكتساب مناعة ...لذلك مو غلط إنو ابنك يكون في عنده أصحاب وأصدقاء من شرائح مختلفة ...بس طبعاً بإشرافك ودرايتك ...
والشي يلي ع بتعملو حضرتك باستغلال الفرص للتوجيه كتير كويس هاي عين العقل ..بس صدقني تأثير الكلام من غير التجربة بيضل أضعف ...وطبعاً المجتمعات يلي عايشين فيها مو معقمة أبداً والحمد لله الذي لا يحمد على مكروه سواه ...يعني إنت ما إلك خبر أنو إبنك ع بيسمع الكلام الفاحش من غير أطفال ...وع بيكتشف أنو في سرقة وفي كذب وغش واحتيال وفي ناس طيبين وفي ناس خبيثين وشريرين ..لا تفكر أنو أولادك مقروئين بالنسبة إلك بوضوح متل ما بدك ...الأطفال اللي ما بيحكو مع أهلهن عن كل شي بيصير معهن بتتفاجئ لما رح يحكو بأنو وعيهن أكبر بكتير من توقعاتك .. ...و لأنو نفوسهن صفحات بيضا فأي تلوث رح يترك أثر فيها ..
المطلوب في التربية الصحيحة زرع القيم الإسلامية الصحيحة والتعامل مع كل شيء في الحياة على أساس القيمة الإسلامية ..
وأهم قيمة إسلامية في تربية الأطفال هي الحلال والحرام والحسنات والسيئات ..قصدي يعني لازم الطفل يتعلم يقيّم سلوكه وسلوك غيره لازم يفهم أنو أي سلوك أو تصرف منه أو من غيره رح تسجله الملائكة في كتاب أعمال الإنسان ويتحول إما إلى حسنات أوسيئات ...وأنو الجنة والنار نتيجة للسلوك ...والنجاح والفشل في الدنيا والآخرة كمان نتيجة للسلوك ..
الأولاد لما بيتعلموا يقيّمو كل شيء حواليهن ويصنفوه إلى حسنات وسيئات ...صعب يقعوا فريسة للأشخاص الخبيثين ...وبقدر أقللك أنو الحدس العاطفي الداخلي عند الأطفال بيخليهن ياخدو انطباعات صحيحة عن الأشخاص الاخرين وحتى لو كانو غرباء وبتكون هالانطباعات صحيحة ودقيقة اكتر من الكبار
أنا أحيانا بحس أنو الطفل بيشوف الشي اللي ما بيشوفو الكبير لذلك هذا النوع من الفراسة الصادقة عند الأطفال بتحميهن لدرجة كبيرة ..
على كل حال ..
متطلبات الأطفال في الحياة الاجتماعية بتكبر معهن وبتفرض نفسها عليهن وعلى اللي خلفوهن ....
ولازم تتقبل أنو النمو النفسي بيكون مرافق للنمو الجسدي ..ومهما حاولت ما رح تقدر ترسم الحالة النفسية المثالية لإبنك متل ما إنت بدك ...هادا مستحيل ....في كتير كلام الأهل ما بيعرفوه عن أولادهن بس الأولاد بيعيشوه وبأثر في نفوسهن حتى يصيرو كبار ....
لا تخاف وحط رجليك بمي باردة ..تذكر حالك لما كنت صغير ...وتذكر حدسك الداخلي واعتدادك بنفسك ..أولادك أكيد متلك ..
أهم شي يتعود الطفل يعبر عن رغباته ويحكي لأهله مشاكله ...ولازم الأهل ما يعّودو الطفل أنو يعتمد على أهله في اتخاذ قراره ...لأ...لازم
أهله يساعدوه على التفكير ويوجهوه حتى ياخد القرار بنفسه ...لازم يشعر أنو أهله متعاطفين معه ...لكن هو اللي رح ياخد قراره .
الله يخليهن ..زينة الدنيا ومتعتها ...والله يحفظهن ويرعاهن برحمته...