********


أشعار الدكتور صبرى إسماعيل


*******


--------------------------------------


ساعات احلم بأنى معاك


كما امبارح


ولحظة انسى بأنى هناك


وعنقود الرضا طارح


واشوفك فرحة الأحلام


وصورة بجد مش أوهام


بحبك وانت متبسم


وقلبى بفرحتك فرحان


واحبّك وانت متنسم


تجاهد سكرة الأحزان


واجهت الدنيا يابويا ولا همّك


وترعد لو ألم صابنى وتتمنى يكون يمّك


أنا أبنك أنا خالك أنا عمك


وأنا اللى كل كان باقى ومن همك


وياما سهرت ويّايا تقرّينى


ألف والهمزة من فوقها تكون الأه


وياما شربت من حبك أمور دينى


تعلمنى حروف أحمد وحُب الله؟


وياما كنت ورداية فى بساتينى


وكلّ العيلة والصحبة وكل الجاه


نخاف منّك ولكن برضه بنحبك


نكون قربك ونتمنى نكون جنبك


وفاكر حصة التسميع


وده فاعل وده مفعول


وده شاغلة عنا الدنيا


وبسّ القول


ودا واصل وده موصول


إيديك بتلمّ أحلامنا


تكون ساعة البكاء بلسم


يداوى فينا آلامنا


تعلمنا أمانينا


كما تايه ينول الشط


وصوت الفرحة فى المينا


ومش فاكرفانوس رمضان


ولمة أهلنا حواليك


وفرحتنا بحكاوى زمان


وانا ماسك بفرح إيديك


حبيبى انت يابويا


وكل الأهل وأخويا


وانا باهرب من احزانى


واعيش الذكرى من تانى


وانا باجرى ولا مصدّق


بأنك عننا راحل


وانا باجرى ولا بنطق


مطالبنى أكون راجل


وانا ليّن كما سِنّى


وليه يادنيا ماتِحنّى


دانا شايف ولا فى الدنيا غير همّى


وانا شايف دموع أمى


وهى باصّة فى عينية


تواسى الحزن فى دمّى


دا انا ابويا زهور الكون


وما ليّه سِوى ربّى


وليه قلبى أنا محزون


واعانى ليلى من كربى


كأن اليتم مكتوب لى


على جبينى


كأن الصبر ده قدرى يبارينى


ولكن رحمة الرحمن


ونور الصبر والإيمان


يخلونى أكون يابا-كتير صابر


واصارع علمى وكتابى واكون شاطر


كما حلمك اكون دكتور


اكون بلسم على المرضان


وبدعى يارب ياقادر


تنولها جنة الرضوان


تنولها جنة الرضوان