منتديات مجلة أقلام

يا مصر

يا مصر يا فلة
مين اللى سرق
من عينك الكحلة

يا مصر يا وردة
مين اللى خان
وسابك فى الشدة

يا مصر يا نخلة
مين اللى خطف
من تحتك الضلة

يا مصر يا حكاية
مين اللى موت
فيكى السهراية

يا مصر يا هرم
مين اللى زرع
فى قلبك الالم

يا مصر يا جبل
مين اللى عايز
يهدم الامل

يا مصر يا جهاد
مين اللى علمك
تسيبى الزناد

يا مصر يا ذكرى
مين اللى اخد امبارح
وبده ياخد بكره

يا مصر يا واحة
مين اللى بيسحب
من اهلك الراحة

يا مصر يا كتاب
مين اللى قفلك
وسنكر الابواب

يا مصر يا جامعة
مين اللى عطل
مواهبك اللامعة

يا مصر يا عطاء
مين اللى حكم
عليكى بالانكفاء

يا مصر يا كبيرة
مين اللى نساكى
هموم العشيرة

يا مصر يا غنوة
انتى مهما عملوا
حتفضلى حلوة