منتديات مجلة أقلام

هذه أول مصافحة أتمنى أن تجد بعض الإستحسان
ــــــــــــــ
*****
بحر الزجل مَدى بلا حدّْ
من عمق أعماقنا مدّدناه
وْآمرْنا يْكون بْجزر ومدّْ
وبْسفون ومْراكب زوّقْناه
تْموّْج و هاج وزْبد ورْغد
تْغزّْل بْالسّما وذابت ف هْواه
-
فن الزجل ...أَباََ عن جدّْ
شِعر بْذاتو بْوجْهو وقْفاه
بْروح وبْكَينونة ف المشهد
طْويّْر شادي يْرتّل مغناه
ف جْبال وسْفوح باح وغرّد
وحلّق وضْرب لوتاد ف سْماه
وبسْمل وحمدل وشهّد
وسبّح صادْح ف رحاب الله
-
عبّرتْ وانتَ عقّب و ردّ
غُوص ف المعنى وعاين مبناه
حْروفنا زَجَل بقْوام وقدّْ
باع وقامة وتيجان وجاه
شِعر مْعطّر بطْيوب الورد
فاض وفيضو عذب ومحلاه
ما اقْترفْناه ..وعْصرْنا شهد
ف المهد رضّْـعْنا و بلّـلْناه
ف كرّاسْنا كتبناه بلْعَسْجد
وبذهون روح العود عتّقناه
قْراه الكادح واللي يحصد
ف قلب الأَبْـجَدي ربّعناه
ف كل صَوب ونادي يتْجدّْد
وفوق لـمنابر ما بـهدلناه
و روْنقناه بْالـمحبّة وبالْوُدّ
وفصّْلنا القول وخيّطْناه
وسخّرنا اليَراع وتْجنّد
وشحدناه سهم وطوّعناه
ف القوس صوّبناه مْسدّد
و دْركْنا الـهَدَف وحقّقناه
حار لقلم لحمر وتْردّد
وكيف يشطّب اللي كتبناه
*****
الزجلية بلهجة مغربية