منتديات مجلة أقلام - لحظه ... ترى ما جيت اقدم لك أعذار

السلام عليكم ورحمة الله وبركاته

إهداء لكل الأخوان والأخوات أعضاء منتدانا الرائع

وأتمنى أن تنال هذه القصيدة على إعجابكم

لحظه ... ترى ما جيت اقدم لك أعذار !!

لحظه ترى ماجيت أقدم لك أعذار
لحظه وبعده سوي اللي تسوين

لحظه بصحح بيننا بعض الأفكار
لحظه بقول حاجه قبل ماتقولين

لاتحسبيني بنثر الدمع وأنهار
وإلا أترجى وأطلبك ماتروحين

روحي عسى دربك بساتين وأنهار
روحي وغيري بالمخاليق تلقين
صحيح لك بالقلب حشمه ومقدار
لكن شسوي لك إذا ماتحسين

لي قلب لامنه عشق حيل مدرار
ومن الغلا عندي يكفي ملايين

بس إن لقى صد وجفا صار جبار
وأقدر أفارق وأهجرك لاتخافين

يابنت أنا لي عزتي وباخذ الثار
وبنصحك لارحت إصحي تنادين

ماني براجع لاتقولين وش صار
لاتسأليني ليه . . ؟ أنتي تعرفين

غيرك تمنوني وبلعب وباختار
وأعشق بدالك ألف وحده بيومين

وأنتي رصيدك بالغلا عندي أصفار
ماهو بذنبي ماعرفتي تحبين

كل الذي لأجلك كتبته من أشعار
والله خساره فيك ماتستحقين

حتى صورك اللي من العام تذكار
بدوسها وأنتي قبالي تشوفين

ياماعطيتك ألف إنذار وإنذار
أقدر أفارقك قلتلك لاتحدين
واليوم أناليه أتعب النفس وأحتار
دامك جرحتيني وكنتي تسلين

إن كنت حي ومن طويلين الأعمار
لجرح بدال الجرح تسعه وتسعين

وألحين ياالله خلي دموعك أمطار
وبحاول أضحك طول منتي تصيحين .

" وبعد مرور فتره من الزمن "

شفتها ياناس صدفة بعدما غابت سنين . .
عند قسم المختبر وسط مشفى الجامعة . .

جيتها ثم قلت ممكن في سؤالي تسمحين . .
ناظرت فيني بنظرة متواضعة . .

قالت أنت تحسبني من بنات صايعين . .
تحسبني في زماني عن طريقي ضايعة . .

قلت أنا ماراح أطول كلبوها كلمتين . .
وأبعدت عني شوية ثم جتني راجعة . .

قالت إسأل واضح إنك من رجال طيبين . .
بس هرجك يالسنافي كان وش هو دافعة . .

قلت أنا حبيت وحدة يوم كنا صغيرين . .
ومن ثمان سنين راحت للمواصل قاطعة . .

عقبها ماذقت نوم يهتنيه النايمين . .
ساهرفي طول ليلي لين شمسي طالعة . .
أذكر إنها فيها حبة فوق ثغرها من يمين . .
وأذكر إنها لاجرينا كن شعرها تابعة . .

وأذكر إنها عاشقة للورد والياسمين . .
صار قلبي بالورود اللي عشقتها زارعة . .
حافظ إسمها بقلبي فية سين وفية عين . .
وفية ألف وفية دال وسط قلبي طابعة . .

قاطعتني بقولها .. سبحان رب العالمين . .
كررتها مرة ومرتين ورابعة . .

قلتها وش فيك وش بلاك يابنيه ترجفين . .
ليش عينك يابنية من كلامي دامعة . .
قالت الموقف وقلبي والمحبة والحنين . .
كيف أشوفك بعد ماكنت عنك قانعة . .

قلت أنا بسألك كانك إنتي بتذكرين . .
عن مواثيق ثمنها من حياتي دافعة . .

قالت ظروف الزمان ماتطيع العاشقين . .
بيعوني غصب حبك لو هو ماني بايعة . .

أنا في دنياي حالتي كنها حال السجين . .
حتى لو فكوا سراحة فيه شي مانعة . .

زوجوني غصب واحد وحرموني حاجتين . .
السعادة في زماني والحياة الرائعة . .
وألحين أنا أم لثلاثة عندي ريم وياسمين . .
والولد إسمه على إسمك والمشاعر جايعة . .

قصة شاعر تدمي القلب لما فيها من أحاسيس من الطرفين مع معشوقته المسكينة

كل الود لكم وأتمنى لكم التوفيق جميعاً