منتديات مجلة أقلام - قصيدة/ مراهقة

يمكن بقدر اسيطر حبه على انفعالاتى
وانتى بتحكى
وانتى بتشكى الظلم الواقع على ايامك
على احلامك
تقصدى نفسك..
بس بتحكى ف صلب حياتى
رعشة صوتك
صدا انفاسك
صوت كنت اسمع منه ف ذاتى
رغم الفرق ف شكل الحالة
كنتى الهالة السوده فى عينى
اللى بتفضح سهرى ليلاتى
عارفك ..فاكرك
سينما بتعرض ليا طفولتك
لسه يا دوب
بتشب الانثى بثورة جميلة
ف قلب مرايتك
عايزة تــفكى ف خلسة ضفيرة
عاوزه تبانى ف لحظة كبيرة
حابه تكونى الانثى الكاملة
وهم سراب الفترة الاولى
لعبه ماكنش ناقصها طفولة
لمحت أمك طيفك
فتنت
هز الرعب كيانها
وصرخت
الحق بنتك
يظهر كبرت
قتلت اجمل حلم ف عمرك
يوم ما اعتقدت
إنك كاملة كمال يسمح لك
تنسى سذاجة اليوم بسهوله
تواجهى الوحش
اللى اسمه رجوله
وانتى يا دوب
فراشايه جميله
ما اكتسبتش الحذر الواجب
من طواغيت النور والنار
كنت الجار
كنت الماضى ف قلب حكايتك
أنا من حدف الطوبه ف أودتك
جنب مرايتك
كان فيه ورقة معاها ...
افتكرى
يوم ما سذاجتى
يوم ما طولت بكام من سنتى
وقلت اكتب لك
أوصف حسنك
طيبة قلبك
أرسم قلب بأول حرف
ف اسمى واسمك
تحت دعاوى لوهم رجولتى
يومها كتبت
لكنى ندمت
ليه ماكتبتش يومها حبيبتى