مسرحية " العفريت الأزرق " ( 1 )

[ربيع عبد الرحمن]

العفريت الأزرق
شخصيات
الإنس
مرجان : شخصية أسطورية .. يبحث عن كنز خلفه أبوه .. يحمل بعض أفكاره الخيرة .. يكره أى شئ يتصل بعالم العفاريت .. يقع فى شباك العفاريت ، ولحسن حظه يتمكن من التحكم فى عالمها !!
مجيد : شخصية أقرب إلى شيوخ العصور القديمة ، يهتم كثيرا بعالم العفاريت ، ويدعى معرفته بالسحر ، وطرد العفاريت !!
معروف : عامل فى منجم ، وهو صديق مرجان .. شخصية طريفة يشارك مرجان الحلم فى البحث عن الكنز !!
الشبح : وهو قرين أبى مرجان ، الذى يحدثه بأمر الكنز ، ويؤكد وجود ه وضرورة العثور عليه .
الكودية : كودية الزار أسطورية الملامح .
فرقة زار : من 4 : 8 بين رجل وامرأة .

العفاريت

روكشى : دلوعة .. جميلة للغاية .. تبدو مغرمة باللعب ، ومص الحلويات إلى أن تقع بين قبضة مرجان .
ياورة : عملاق
سليلة : عملاقة
سلطان : قزم بفمه أسنان صناعية بالفضة
كاورة : قزم
ست الكبيرة : عملاقة وعايقة
مارد : بدين .. متوسط القامة

الزار

مجموعة رجال وسيدات يمثلون الزار ومشاهديه.
مؤلف النص






اللوحة الأولى : ما عفريت إلا بنى أدم

المنظر : خلاء ممتد ، على جانب الخشبة الأيمن ساقية تحتضنها شجرة توت ونخلتان متعانقتان .. الساقية يبدو عليها القدم والتأكل وفى الجانب الأيسر من الخشبة مدخنة .. مرجان يدور بين الجانبين حائرا ، ويبده خرائط وأوراق تتميز بالحجم الكبير .

مرجان
( العرق يملأ وجهه .. ويبدو عليه الاجهاد ) يظهر مفيش فايدة يا مرجان .. معقول !! يطلع كل كلامه فاشوش .. كله فى الطراوة .. معقول يابه كنت بتضحك على عقلى ..الله .. بس أنا ياما شفته هنا .. قاعد على مدار الساقية .. المكان الوحيد اللى ما غيروش طول عمره .. وعينه اللى زى عين الصقر على الحتة دى .. ساعات طويلة ( يرفع الخرائط قليلا ) حتى الخرايط مش فاهم منها حاجة .. كلها شخبطة ولخبطه آه تعبت يابه .. تعبت .. دى خرايط الكنز فعلا .. ولا مجرد خطوط وتشخبيط !! يابه ( ينادى ) رد على .. أنا ابنك .. أنت مش وصتنى .. قلت لى الكنز .. الخرايط .. كان قصدك إيه ؟! تقتلنى من اللف والدوران .. والجرى ورا خرافة .. وحلم مالوش وجود ؟ عشر مرات .. عشرين مرة .. أدور هنا .. هناك .. فى الدار .. فى الغيظ .. فى الـ .. ومفيش فايدة .
( فجأة نرى شبحا بين الشجرتين )
الشبح ما أنا قلت لك كل حاجة .. عايز إيه تانى ؟
مرجان مين ؟ ( يتراجع ويدور خائفا )
الشبح مش عارفنى يا وله ؟
مرجان مين ؟ ( وما زال يبحث )
الشبح أنا هنا .. فوق دماغك دوغرى
مرجان دماغى وهو أنا عاد فيه دماغ
الشبح ليه يا وله ؟ لحسته القطة .. رهنته .. ولا بعته بالكيلو ؟
مرجان ( يراه ) مين ؟ أبويا !!
الشبح أبويا ( مقلده ساخرا )
مرجان صحيح .. إيه اللى معقول ( يمسك رأسه )
الشبح فت لك كنز .. كنز قد ( يحاول تضخيم المقدار بذراعيه ) .. وفارقتك .. لقيته ولا لأ؟
مرجان الكنز .. آه الكنز
الشبح كله بيوقوق .. كله .. اللى بيلحس الزلط بيوقوق .. واللى بيلحس فى الـ ( ) برضه بيوقوق .. عايزين إيه ؟
مرجان نور على يابه .. دلنى ؟
الشبح أكتر من كده ؟ الكنز فى إيدك يا أهبل .. دور عليه .. فى الورق اللى أنت ماسكه .. دور يمكن ..
مرجان تعبت يابه
الشبح تعبت .. يا خيبتك القوية .. وأنت لسه شفت حاجة !!
مرجان قل لى يابه .. ارحمنى ؟
الشبح ارحمك .. وهو أنا تعبك ؟
مرجان حملك تقيل عليه يابه !!
الشبح أنا ( يقهقه ) يعنى أنت دورت يا خى ؟!
مرجان كتير .. كثير قوى
الشبح يمكن حد سبقك .. ولطشه يا وله ؟
مرجان معقول ؟
الشبح ومش معقول ليه ؟
مرجان الخرايط والورق معايا زى ما سبتهم .. بلفتهم .
الشبح قلت لحد غريب يا وله ؟
مرجان وهو الغريب مستنى حد يقوله يابه ؟
الشبح أمال ؟
مرجان فيه دلوقت يابه حاجات تانية .. دلوقتى بيعرفوا شكل الجنين فى بطن أمه .. ولد .. ولا بنت .. الأرض دى دكر ولا نتايه .. دول وصلوا للقمر والـ..
الشبح وأيه يعنى ؟ أهم من دا وده .. دورت كويس ؟
مرجان دورت ؟!
الشبح جبت الملبس .
مرجان من كوفرتينا
الشبح يبقى مفيش بوروبلم
مرجان ولا حاجة .. لا جهاز ولا جواز .. شقا وتعب .. ولف ودوران وفقر .. كل حاجة زى ما هى ..يابه فيه كنز ولا لأ ؟
الشبح أوعى تكون صدقت اللى قالوه الناس .. أل إيه كنت راجع من الغيط واخرى .. لقيت على الشط لفة هدوم .. جديدة ..
مرجان مش قصدك يعنى .. جلبية لشلبى ( يضرط بلسانه ) وجلبية لأم الهنا ( يضرط بلسانه ) وجلبية لستيته .
الشبح ( يقهقه ) اللفة تقلت .. تقلت .. تقلت .. رمتها .. ورمحت وهيه ورايا .. بتقول جلبية لشلبى ( يضرط ) وجلبية لستيته ( يضرط ) جلبية لأم الهنا .
مرجان ده كلام فارغ يابه
الشبح بس كان حلم .. حلم يابن أم الهنا .. قول لى .. ودورت عليه عند العفاريت ؟
مرجان العفاريت .. يابه ( يضرط ) جلبية لشلبى .. جلبية لمرجان .
الشبح أيوه العفاريت . مستغرب ؟! يمكن ضحكت على أنا .. وسرقته منى وأنا مش دريان ( يقهقه) يمكن !!
مرجان يمكن إيه بس يابه ؟
الشبح أنت ناسى اللى طلعوه عليه .. أبو مرجان مخاوى الجن .
مرجان يابه .. دلنى .. قولى الحقيقة .
الشبح كلام الناس كان صح .. العفاريت زى ما سرقت حلم الستر منى .. ركبت دماغى .. مسحته بأستيكة .. سرقت عمرى كله .. شقايا .. أرضى .. ويمكن تكون سرقت الكنز راخر .
مرجان يابه ما عفريت إلا بنى آدم ..
الشبح جيت لمربط الفرس .. بالشكل ده تحل كل ألغاز الخرايط والكتب واللى جواها !!
مرجان بس يعنى ؟
الشبح بس إيه ياوله ؟ دور تانى .. فى الكتب .. فى الخرايط .. عند الناس اللى بتحبهم وبيحبوك
مرجان يابه ؟
الشبح ياك بو يتحشرك .. ما تسمع الكلام يا وله ؟!!
مرجان كلام ايه بس ؟
الشبح مفيش غير العفاريت .. زى ما سرقوا عمرى وأعمار الناس زمان .. بالخوف والرهبة والجبروت .. دول مليين البلد !! ملينها يا وله !!
مرجان معقول يابه ؟
الشبح أنت ياد دماغك ناشفة .. ما تسمع الكلام أمال .
مرجان العفاريت يابه ؟
الشبح دايما العفاريت كان لها حكايات وحواديت مع الكنوز .. دايما .. دور
وأنت تعرف .. أنت مش قلت من شوية ما عفريت إلا بنى آدم .
مرجان تانى أدور ؟
الشبح خلاص خليك فى حالك .. وسبنى فى حالى
مرجان دا شئ يهد الحيل يابه
الشبح اللى يهد الحيل صحيح السكات ومصمصة الشفايف زى الحريم .. والكدب ع الناس ليل نهار
مرجان أنا .. أنا يابه ؟!
الشبح فز ياد .. ودور تانى ..عندك الناس .. الخرايط .. الكتب .. وهو أنا كنت باعلمك ليه .. هيه؟ دور .. دور عند أصحابك مجيد أو معروف أو .. ( صمت ) بس أمانة عليك لو لقيته أوعى ...
مرجان أوعى أيه ؟
الشبح ( وهو يختفى ) أوعى تبقى .. أوعى تبقى .. أوعى !! وافتكر دايما ما عفريت إلا بنى آدم .. ما عفريت إلا بنى آدم .. إلا


( ستار سريع )

[أحمد كمال]

شكراً لك أستاذ ربيع
أمتعتني هنا

[ماجد غالب]

استاذ ربيع، لماذا العامّيَّة وانتم متمكِّنون من الفصحى على ما أرى؟!
مع فائق احترامي.