|
|
مواقع النشر المفضلة (انشر هذا الموضوع ليصل للملايين خلال ثوان) |
|
أدوات الموضوع | تقييم الموضوع | انواع عرض الموضوع |
06-12-2008, 03:10 AM | رقم المشاركة : 1 | |||
|
أوبريت " شربات " (( 3 ))
اللوحة الثالثة فى فيلا شربات – فى البهو متكئات متناثرة و أرائك رجال ضخام متوزعون فى أرجاء المكان-بينما تسترخى شربات فى وضع مثير رغم سنها الكبير شربات : ياسلام 00 مسير الحى يتلاقى طه : مفيش كلام 00 مسير الحى يتلاقى شربات : فاتت أيام وشهور وسنين طه : فاتت شربات : فاتت عليك مش عليه ! طه : يعنى إيه ؟ شربات : أفهمك 00 زى قطر فات عليك و أنت قاعد00 أما أنا حاجة تانية لجل مايعديش عليه كنت أنا اللى باسوق فى قطرى ! طه : حاجة تفرح شربات : مش باين طه : قصدك إيه ؟ شربات : لو حاجة تفرح زى قولك 00 كنت جيتنى ع المحطة00 ويا ناسك !! طه : مش حاتفرق 00 البلد كات ع المحطة زى يوم الحشر حطة 00 بالأناشيد والطبول 00 والعيال سرقاها فرحة ! شربات : أنت عارف كل دول مايهمونيش 0 أنت عارف 00إيه بتساوى عندى ؟ طه : بعد كل العمرده ؟ شربات : بعد كل العمرده 00 أنت واقف 00 على عينى وقفتك 00 لابد تقعد 00 عندى لك كلام كتير 00 ساقع ولا سخن 00أأمر ! طه : و لا ساقع ولا سخن شربات : ودى تيجى 00 دا أنت حبة ننى عينى 00 على عينى جيتك ! طه : أمرك ياهانم ! شربات : (رجل ضخم ) شوفوا ضيفنا يشرب إيه ؟ الرجل : أمرك ياسيد طه : أى حاجة الرجل : زى إيه ؟ طه : أى حاجة الرجل : ( يدنو بقوة وغشم ) زى إيه 00 لازم تحدد ؟ طه : أى حاجة الرجل : ( يهجم عليه ويضغط على رأسه ) لازم تحدد ؟ طه : يابنى حاسب 00آه ياراسى 00هيه تلزم ؟ الرجل : انطق وإلا ؟ طه : قهوه سادة 00 قهوه سادة شربات : قهوة سادة 00كان بيشرب قهوة سادة 00وأنا داخله بالإزازة 00أنتِ مين؟ أنا هيه 00 مش عارفنى ياواد ياطه 00 عايزه إيه ؟ حد برضه يقول كده لبنوته حلوة ؟ يللا غورى 00 مش هاغور 00 يللا امشى 00 مش راح امشى 00 إدينى بوسه 00 ضمنى ياواد ياطه 00 لحسن أصرخ بعلو صوتى 00 وأنادى ع الخلايق 00 ياخلق هوووه 00 الحقونى 00 ياخلق هوووه 00 حطنى فى شوال 00 خطفنى 00 آه يابنت اللئيمة !! طه : أنت ماصدقت يابنى 00 أنت هاتسقينى 00 ولا هاتشرب فى دمى ! شربات : مش خلاص 00 يللا ( ينسحب الرجل ) طه : آه 00 أنت عملاه من حجر 00 ولا عملاه من حديد ؟ شربات : عندى زيه 00جيش بحاله 00جيش بماله كل واحد خدله يوم من عمرى واكتر !! طه : كل واحد 00 يوم 00 من عمرك00ياداهية سوده 00يعنى ألف ؟!! شربات : أكتر 00 وده غير اللى عملاه تكنولوجي طه : أكتر كمان ؟ شربات : دول غير اللى ماتوا 00 ديمقراطية 0 طه : بس برضه 00 الشيطانة 00 بتاع زمان لسه برضه زى ماهى 00 الطزاجة هى هيه .. والرشاقة والجمال 00000000 شربات : ( تقهقه بسخرية ) ياراجل 00 الكدب بعد العمرده عيب عليك00ولا يمكن النظر بقى عيبة فيك ( تضحك ) : أربعين سنة بالتمام أربعين طلعة جبل 00مضروبين فى تلتمية 00قول ربعمية إلا ربع أربعين غصة ألم 00 مضروبين فىتلتمية 00 قول ربعمية إلا ربع فى كل ساعة وأنا عايشه بالأمل ساعة عافية 00 ساعة طاعة علمتنى الوضاعة 00 والبراعة حاجات .. فى غاية الشناعة قلبى حن للوداعة 00 وكلمة حلوة 00ودنيا لو هاشتريها مش خسارة طه : هيه 00 كات شقاوة زمان 00 وراحت شربات : هيه هدمه لبستها 00وقلعتها وقلت دابت00 أنت إيه ؟ طه : كل وقت وله أدان شربات : واللى عايش جو جلده 00 من سنين ماغيروش ؟ طه : صعب شربات : واللى راح مالوهشى ذنب ؟ طه : كلنا هانروح فى يوم 00 يوم محدد 00 يعرفه رب الخلايق شربات : ياترى 00 لسه فاكر ؟ طه : لسه فاكر إيه سعادتك ؟ شربات : إللى كان ؟! طه : اللى كان ! شربات : مش مهم 00 المهم إن أنا وأنت هنا 00 والأهم اللى جاى عندك عيال ؟ طه : زى حصى الأرض .. واكتر ! شربات : بتحبهم ؟ طه : كلهم شربات : كلهم ؟ طه : كلهم 00هو فيه أب مايحبّش عياله ؟ شربات : آه صحيح 00 طه : وأنت 00 فين ولادك ؟ شربات : ولادى ؟ طه : أنت خارجه م البلد 00 والواد فى حضنك شربات : لسه فاكر ؟ طه : أيوه فاكر شربات : يعنى فاكر الجريمة ؟ طه : الجريمة !! شربات : مش قادر تصدق 00 أنت حر ! طه : الكلام بالشكل ده 00 بقى طعمه مر شربات : مش مصدق إنها كانت جريمة ؟ تنطرد بنت بوليدها 00 اللى عمره يدوب ساعات والبلد وراها زيطة 00 بالحجارة والزبالة كل واحد عبى حجره طوب ودبش 00 كلهم بيسوقوا بنت ووليدها الرضيع 00 طه : أنا ماشى ! شربات : تمشى فين ؟ أنت لسه زى ماأنت 00 الزمن ماعلمكشى .. أى حاجة ؟ طه : يعنى إيه 00 مش قادر أفهم ؟ شربات : يعنى تسمع 00وتجاوبنى وإما أخلص اللى عندى و أحاسبك 00 وتحاسبنى ساعتها 00 من سكات 00 تبقى تمشى طه : يعنى 00 ما أقدرشى أمشى ؟! شربات : جرب كده ! طه : أنا هامشى 00 وأما شوف مين يقدر يحوشنى ( يتجه صوب الباب 00 يقابله رجلان قويان 00 يسدان عليه الطريق 00 لا يجد مهرب 00يتراجع خوفا على كرامته ) دينك 00 عند شربات الفراشة بتاع زمان 0 مش عند طه ولا مرسى 00 أو رجب 00و لا القاضى سليمان ! شربات : ( تقهقه ) ماتخافشى 00تعالى أنت ليه .. واخد الأمور بحدة ؟ طه : خوف دا إيه ؟ أنت عارفة 00 إن عمرى ماخفت أبدا شربات : أنا عارفة ( تضحك بعصبية ) طه : لو لسه فاكرة 00 افتكرى دايما البداية كات بايدك شربات والنهاية وراس عظمتك 00 راح تكون بايدى برضه طه : وماله 00 شربات : كان كفاية عليه سترك !! طه : يعنى إيه ؟ كنت أقول للقاضى 00 والناس فى البلد شربات قالت الحقيقة 00 وإنى مذنب واللى بين حشاها ابنى ؟ شربات : من ستر مؤمنا 000000000( الحديث الشريف ) طه : شربات (بحدة ) شربات : إيه غلطت ؟ طه : يعنى معناة الكلام إنى أطلع كلب ابن كلب ومش بعيدة واحدة تطلع تقول خطفنى 00أو حدفنى و أى حاجة 00 تقولها طبعا تبقى صدق 00 و عين الحقيقة وأنا 00 أبقى إيه ؟ أنت إيه ؟( يصرخ ) شربات : كنت ريداك كنت عايزه أتوب 00اغسل نجاستى واصرخ ياناس 00 أنا طاهرة 00 أنا طاهرة والدليل إنه طه 00 طه الشريف ابن الشريف اللى تعرفوه تمام 00 ابنى شريعى 00والله شريعى طه : يعنى نقيتى 00 بمزاج ؟ شربات : إن عشقت اعشق قمر 00 وإن سرقت اسرق جمل وأنت كنت فى البلد دى ..... ! طه : بس أنا كنت ارتبطت بنت حلوة طيبة يهمها سمعة راجلها شربات : ارتبطت لجل تقفل البيبان فى وشى يومها طه : أنا لا عمرى وعدتك 00 ولا كان بينا اتفاق شربات : هى نومتى فى فرشتك 00 مش تعتبر برضه اتفاق ؟ طه : دا كلام يعقل ياناس 00 وأنت دايره ع العشش كل ليلة فى حضن شكل هو إيه 00 رمى جتت و لا تهمة و السلام 00 من غير أساس ؟ أنت إيه ؟! شربات : كنت حبيتك خلاص 00حلمى كله اتبنى فىأرضك أنت ! حضنك الدفيان هايلم ابنى !! طه : طب قوليها لحد تانى 00 جايز يصدق الوحيدة اللى تعرف 00 هو مين 00 هو أنت 00 شربات : والشهود قالوا اللى أنت قلته ياعم طه طه : الشهود قالوا الحقيقة ! شربات : الشهود ماقالوش حقيقة طه : الشهود قالوا الحقيقة ! شربات : الحقيقة إن واحد م الشهود 00 يبقى أبوه ! طه : كان أولى بيه ! شربات : ماكانش يقدر 00حلمى أكبر ؟ طه : أنت عايزه نصيحتى 00 ارجعى مطرح ماجيتى 00 ارجعى وبلاش فضايح شربات : أنت بتهددنى ؟ طه : وأنا إيه عشان أهدد 00 العيال الصغار مايعرفوش 00 كنت إيه زمان ؟ شربات : لازمن يعرفوا طه : يعرفوا إنك 000000000000تبقى داهية 00 المحسنة 00 أم القلب الكبير أصلها يبقى 000000000لأ شربات : سنين طويلة 00عشتها ليلة ليلة 00أربعين سنة ماشفتش فيها نور 00 إلا نور الكهربا والبهوقة 00 والشقلبة 00عشتها بحلمى الكبير 00حلم لساه فى صدرى 00إنى أشوف يوم البلد دى .. راكعة تحت رجلى 00راكعة تحت رجلى 00 راكعة تحت رجلى ! طه : مش هاتركع البلد لجنس مخلوق ياعظمتك 00ارجعى مطرح ماجيتى 00 00 يوم ماتركع قولى ع الدنيا السلام شربات : لازمن هاتركع 00 المصانع اشترتها لاجل تركع 00 والغطان بورتها لجل تركع 00 والمناجم والبحور نشفتها لجل تركع والـ000000 طه : ياه 00معقول 00 كل ده ؟ ( يسقط على الأرض من هول المفاجأة ) شربات ( تضحك 00 تتمايل بوحشية ) كات مجرد الشرارة ! طه : وأنت جيه تكملى ( مازال غير مصدق 00 يقف يدور حول نفسه ) شربات : عمرى 00 أدفعه لجل لحظة ! طه : شربات 00اللى عاشت بنا طفلة صغيرة 00 بريئة حلوة مغندرة 00فى التراب لعبنا ياما 00 والبحور غرقتنا بخيرها ياما 00 والغطان ياما فيها اتدرينا .. حلمنا ياما 00شربات اللى كانت بنت حلوة 00 طينة بلدنا اديتها ياما .. حسن و حلاوة ومليون علامة 00 فضلت الحرام ع المباح وع الحلال 00 00عاشت جرادة تنط من بيت لبيت 00 أصلها من بيت نجاسة 00 مش م البلد دى 00 دمها بيصب فى عروقها النخاسة 00 كل شىء راجع لأصله 00 لأصله ! شربات : ( تضحك بهستيريا ) كمل 00 ليه سكت ؟ طه : لازم أسكت 00 لأجل أعرف 00 فى الجراب ياحاوى إيه ؟! شربات : البلددى 00 خرجت منها بحكم ظالم وهيه بلدى 00 هيه بلدى طه : جه أبوك 00 زمان غريب حافى القدم 00 صدره عريان بيرجف حط بينا 00 دفيناه وعاش فى خيرنا 00 قال دى بلدى 00 فرحنا بيه بقى منا 00 إدينله بيت واسم وصانعه ياكل بيها عيش عاش معانا زى واحد منا طبعا 00 شال جميلنا 00 شلناه ف القلوب 00 واحنا مانعرفشى أصله .. ولا فصله يبقى إيه 00كاثوليكى 00 يهودى 00 درزى 00 00ارثوزكسى .. و ..........مش مهم شربات : ( بهستيريا ) اكتفيت منك خلاص 00 يللا غور 00 غور طه : أشكرك شربات : بكرة تعرف 00 مين هايركع تحت رجلى 00 بكرة ( بعصبية ) طه : بكرة نعرف 00 مين ها يركع 00ياست الهوانم ( يخرج ) إظـلام |
|||
07-12-2008, 12:32 AM | رقم المشاركة : 2 | |||
|
رد: أوبريت " شربات " (( 3 ))
المبدع ربيع عبد الرحمن..تحياتي |
|||
07-12-2008, 05:15 AM | رقم المشاركة : 3 | |||
|
رد: أوبريت " شربات " (( 3 ))
استاذنا الجميل ربيع |
|||
07-12-2008, 10:10 PM | رقم المشاركة : 4 | ||||
|
رد: أوبريت " شربات " (( 3 ))
اقتباس:
ليتك تفعل فلغتك تؤثرنى .. و تدهشنى إلى حد بعيد .. و تجعلنى أتمنى لو كنت قريبا لدفعت إلى المسرح دفعا ، و لعلمك أنا لى سطوة على أصدقائى هنا .. سطوة فنية و ليس شيئا آخر !! محبتى مجدى الجميل |
||||
أدوات الموضوع | |
انواع عرض الموضوع | تقييم هذا الموضوع |
|
|