بغداد

[عيدو كنعان]

{بغداد قصة عشق}

يا دهر يا مفرق الأخوال والأعمـــــــام
هديتني يا دهر واغتلــــــــــت إخواني
وألقيتني يا دهر في قبضـــــــــة الظلام
وحرمت عيني الكرى وأبقيت أحزاني
وخليتني مرتبـــــــــك ما بين عام وعام
أندب سنيـــن العمـــر ويزيـــد إدماني
وأحلم بساعة صفا ويـا مصعب الأحلام
غرقان مالي حدا ويا بعــــــــد شطآني
وأحلم بأمــــة محمــــــد تسرج الأجرام
وتنشر رسالة أمن ببلاد خيفـــــــــاني
وتزحف جيوش الفتح وترفرف الأعلام
وفرسان الله ع نشر الديـــــن سهراني
وتقتل ملوك الكفر وتكسر الأصنـــــــام
وتحكِّـــــم السيف فوق اللص والجاني
لكن كسرنا بيدينـــــــــا السيف والأقلام
وبعنا المجـــد والشرف بقداح و قناني
وصرنا كمـــــالة عدد لو انعدت الأقوام
عـــــد المواشي بتالي السوق خسراني
وصرنا عبيد الكراسي وشي اسم حكـام
لكن على بعضنا آســــــــــاد غضباني
والشرق والغرب فينا يجرب الألغـــــام
ويجــــرب السرج والخازوق من تاني
ونترك الأقصى الجريح يكابـــــد الآلام
و حيــط البراق العزيز بيوت خرباني
ونبيع أرض الفتــــوح بأرخص الأرقام
بسهرات حمرا بفنادق كــــان عمراني
ونبيع نفط الخليـــــــج و نشتري برشام
وحبـوب زرقا تخلي الروس عليـــاني
ونبيـــــــع أهل العراق لعصبة الإجرام
ويا وقعتــك يا عراق الكلاب سعراني
ونبيـــــع و نبيـــــع حتى ما يضل كمام
ولا يضل ناموس يستــر بنت عرياني
ونسجد خلف شارون ونصوم مع إبرام
ونحج ع نيويورك وننــــــــام طلياني

* * * *
بغداد أم الحضارة وموطن الإلهـــــــام
صارت تراب وحجارة مالهــــــــا باني
بغداد آيــــــــة بمصحف خطها الرسام
بغداد قصـــــــــة عشق : موال وغناني
بغداد باقــــــــــة ورد والشوك فيها نام
لازم ننقي القمـــــــــح من كل زيواني
بغداد مجــد العرب من عهد سام وحام
بغدادكم يا عرب ما في لهـــــــــا تاني
لو كـــــان فيكم فضل ذرة من الإسلام
كنتو دعيتــــو لها ما تنـــــام زعلاني