من الوان الشعر ( الزهيري)

[احمد الرواز]

سهام هجرك دون بأكصى الضماير عاد
وجانون جمر الغضى اسوى دليلي وعاد
فراك الغوالي من ربك امر ووعاد
اصبر يكلبي ترى غير الصبر مالك
الهام بيت بدليلي بنى واصبح المالك
مريت دوم الوحل تسألني مالك
غوركت عيني ويعلها بي مساكن عاد

اشكرك على هذه اللوحة الجميلة وعنوان البوست

[احمد الرواز]

من اليوم كصر الحزن عالجتاف راح ابنه
ورغم الحزن نبتسم لليجي ورحبنه
ايواعدني جرحي القديم ايكول راح ابنه
مابنى لليوم محد يا كلب حولك
لحد يجسمي شعجب شو منهدم حيلك
تسألني عكب الولف ياصاحبي أشحالك
حال الغريب بصباح العيد راح ابنه

[احمد الرواز]

المشاركة الأصلية كتبت بواسطة سمل السودانى

اشكرك على هذه اللوحة الجميلة وعنوان البوست

الاستاذ سمل المحترم ... اشكر مرورك الكريم على صفحتي المتواضعة

[احمد الرواز]

موذيب عضني عكب فركى الغوالي نمر
والدار توحش ولانكدر عليها نمر
الكلب مختوم من دون الخلايك نمر
موجود وسط الحشى برسوم متوضحه
ويزيد حزني كلما اخمل واضحه
نمر البوادي بزمانه من جتل وضحه
بفراك خلي تراني امسيت حالة نمر

[احمد الرواز]

ابيع عمري برخص يا صاحبي بس مر
من كثر شوكي ألك راس الكلب بسمر
ملكاك طعم العسل وافراقكم بس مر
مروا علينا ولو بالعام لو ساعه
وسود العكارب على الدلال لساعه
يازين تاه العكل بافراقكم ساعه
والله يردلي العكل لو بس علينا تمر

اقدم لكم ليوم قصيدة للشاعر الكبير (( عواد التبان )) اتمنى أن تنال اعجابكم ....... شيب ياراسي كبل وكتك دشيب منهو اليومك يخايب لو شبت طيب ياجرحي بجاد دواك طيب باجر دوة الذل يعيرك لو طبت الامثال تصيب نادر ماتخيب هاذي حكمت ناس شافت جربت رضعت من طبع وية الحليب لو جعت ماكول للوادم جعت لو عطشت اعطش جمل لو جعت ذيب تراب الهم والعواذل مادرت شايل بحدر الظلع موطن صويب تنزف جروحة قهر مابطلت لتعجب مابقى عدنه عجيب باوع غيوم الشتة تراب امطرت هنه من صار العرك وصف الطبيب وبية بنات بيوت شربت وسكرت وهنة من صرنة خدم عند الغريب والضماير بينة ماتت وسكتت وهنة من صرنة نشامة بتل ابيب شنهو تفسيرك لعطلتنه السبت

[احمد الرواز]

بأكصى الضماير علي متخالفات النوب
متباديات بنهب من غير فاصل نوب
واشلون حال الذي جثرن عليه انوب
من يوم طرو الرحيل اكلوبنا منسرت
اظلم عليه النهار اضعونكم من سرت
ياحادي العيس مهل مشيتك من سرت
خلنا انتوادع من ايكول انتلاكى انوب

[احمد الرواز]

غربلت ربعي ثلث نوبات تاجلهم
وفرزت العزاز واهل الطيب تا اجلهم
ميه بالميه قست واطلعت تاجلهم
وعديت عدت عرب و انك للخوي لازم
وانك سند بالعسر مثل البحر لي زم
من فزت بالمرتبه صار الظرف لازم
واعرفت انك ينسل الطيب تاج الهم

[احمد الرواز]

جدام الغروب افطن وانــــــهظم وانــي
مكدر انساهم مثل فاضي الذهن والني
ونيت لفراكهم بس مـــــــــــا نفع وني
ياحيف ضاع اتعبي ورباي وشـــــجايه
الكلب غير الغثى مـــــن الراح وشجايه
كلما ابطل عنين الجبـــــــــــد واشجايه
بوم الخرايب يرجع لوعتــــــــــي اوني

[مرام شهاب]

شفت البنيه وحامله شنتطها
بئلم حومره مزينه شفتها
لروح لبوها وعمها وخالتها
واعمل عمايل تنكتب بالدفتر

----------------------


شفت البنيه وحامله شمسيه
يمشي على حدها الف قول ميه

لمشي وراها مثل رئيس الحرميه
وكتب صحايف بالخط الإحمر

[احمد الرواز]

المشاركة الأصلية كتبت بواسطة مرام شهاب

شفت البنيه وحامله شنتطها
بئلم حومره مزينه شفتها
لروح لبوها وعمها وخالتها
واعمل عمايل تنكتب بالدفتر

----------------------


شفت البنيه وحامله شمسيه
يمشي على حدها الف قول ميه

لمشي وراها مثل رئيس الحرميه
وكتب صحايف بالخط الإحمر

شكرا سيدتي
ان ماسطرتيه هو مايسمى بلون( المامر) وهو رباعي التكوين
مرورك اورق في صفحتي وقدح الياسمين